انقطاع المياه بيتكرر في أوقات مختلفة وممكن يستمر لمدة طويلة أو قصيرة حسب سبب العطل، وبالتالي ضروري تبقى مستعد لأي انقطاع مفاجيء فيها سواء كنت متبلغ بيه قبلها أو لأ، وضروري تعرف أرقام شكاوى المياه عشان تبلّغ عن أي انقطاع استمر لمدة طويلة.
احتياطات قبل انقطاع المياه
- املا الزجاجات الفارغة كلها بالمياه وخزّن جزء منها في دورة المياه احتياطي عشان تستخدمها وقت أي انقطاع مفاجيء
- الأحسن تستغل جراكن صابون غسيل الأطباق لأنها بتستوعب عدد أكبر من الليترات وبالتالي تقدر تخزّن كمية أكبر من المياه
- اتأكد إن تلاجتك فيها مياه تكفي عدد الأفراد الموجودين في البيت ومهم تحسب لكل فرد زجاجتين مياه على الأقل
- لو بتستخدم مبرّد المياه اتأكد إن عندك قارورة إضافية
- الأحسن تركّب خزّان خاص ببيتك لو عندك القدرة المادية
- الشطافة المحمولة ضرورية لاستخدام الحمام وافتكر إنها استعمال شخصي
- لو اتبلغت قبلها بفترة كافية املا جزء من البانيو لو من النوعية اللي تستحمل عدد كبير من لترات المياه
- استغل أواني الطهي في ملأ أكبر عدد ممكن من المياه فيها عشان تقلل احتياجك للمياه وقت انقطاعها
- استغل الوقت في أي نشاط خارج البيت لو مش عندك أي التزامات داخله
- اتأكد من إحكام غلق كل محابس المياه وقت الانقطاع لأنها ممكن ترجع فجأة وباندفاع شديد وتسبب مشكلة كبيرة
- انتبه لأي صوت في الشارع لأن في أغلب الأحيان بترسل شركة المياه سيارات متنقلة بتحمل مياه مجانًا تقدر تملا منها مؤقتًا
ترشيد استهلاك المياه المخزنة
- لو معاك شخص تاني في البيت خليه يساعدك في صب المياه على إيدك أو غسل وجهك
- افتكر إنك بتستغل المياه للاستفادة الضرورية الملّحة مش للرفاهية
- استخدم أقل عدد ممكن من أواني الطهي والأطباق خصوصًا لو المياه هتقطع لفترة طويلة
- خصص كوباية واحدة لكل شخص يشرب فيها ويغسلها بنفسه عشام تتجنب تراكم الصحون
- تناول كميات كبيرة من الطعام هتضطرك تدخل دورة المياه باستمرار وبالتالي استهلاك مياه أكتر
شكاوي المياه
- موقع الشركة القابضة لمياه الشرب والصرف الصحي بيوفر خدمة كتابة الشكاوى عليه
- أو عن طريق تطبيق اسمه 125-HCWW لاستقبال شكاوى المياه
- الخط الساخن 125 لمياه الشرب وأرقام كتير على الواتساب تقدر تتواصل بيها مع شركة المياه حسب محافظتك
