المحتويات
الفيبروميالجيا أو الألم العضلي التليفي هو مرض بيسبب آلام شديدة في البنية العضلية لجسم الإنسان وإرهاق شديد، نتيجة إصابة جسدية أو صدمة نفسية شديدة وبتزيد فرص إصابة السيدات بيه عن الرجال.
تعريف مرض الفيبروميالجيا Fibromyalgia
- هو اضطراب بيسبب ألم واسع في البنية العضلية الهيكلية وبيسبب حالة من عدم الإتزان النفسي وبيزوّد مشاعر الإرهاق والقلق وبيضعف الذاكرة بجانب إنه بيسبب أحيانًا أرق واضطرابات في النوم
- بيزيد الإحساس بالألم لأن الدماغ والحبل النخاعي من معالجة الإشارات المؤلمة وغير المؤلمة
- الأعراض بتظهر مع الإصابة بحالة عدوى بسبب عملية جراحية أو نتيجة للتوتر والضيق النفسي
- فرص الإصابة بالمرض بتزيد عند النساء أكتر من الرجال وبيحسّوا بالصداع التوتري واضطراب المفصل الصدغي الفكي والقلق والاكتئاب والقولون المتهيج
الأعراض
- ألم بتختلف شدته من ضعيف لألم شديد مستمر لمدة 3 شهور على الأقل وبيحس بيه الشخص في كل أنحاء الجسم خصوصًا عند اللمس
- يعني لما بتلمس موضع الألم بيزيد الإحساس اللي ممكن تقل حدته أو تزيد مع مرور الوقت
- بيحس الشخص بالإرهاق والرغبة في النوم لمدة طويلة حتى مع النوم والراحة المستمرين لساعات طويلة
- بتقل القدرة على التركيز والانتباه خصوصًا وقت أداء المهام العقلية الصعبة
- الألم بيزيد في بعض الأوقات زي وقت الاستيقاظ من النوم وفي بعض الأماكن وبيتركز في منطقة الفك
- بتتصلب العضلات بمرور الوقت وبيصعب النوم
معايير تحديد الألم
- الموضوع مرتبط بمعايير معيّنة بتساعدك وبتحدد بعض مناطق الألم
- المناطق دي هي الذراع والفك والكتف والأرداف والساق والرقبة والصدر والظهر والبطن
أمراض تانية ممكن تصيب المصاب بالفيبروميالجيا
- متلازمة القولون المتهيج
- اضطراب المفصل الصدغي الفكي
- الاكتئاب
- القلق
- تسارع النبض الشديد
- متلازمة الإجهاد المزمن
الأسباب
- التحفيز المستمر للأعصاب بيسبب تغيرات في الحبل النخاعي والدماغ عند الأشخاص المصابين بالألم الليفي العضلي
- بتزيد كمية المواد الكيميائية في المخ المسؤولة عن نقل الألم في الدماغ والخلايا المستقبلة للألم بتكوّن شيء اسمه حساسية الألم وهو عبارة عن مبالغة في رد الفعل وقت التعرض للألم
- بيحصل نتيجة عدة عوامل منها الجينات الوراثية أو التعرض لألم بدني عنيف سواء في حادث سير أو أثناء إجراء جراحة معيّنة
- من أكتر الأسباب شيوعًا هي التعرض للألم العاطفي والإصابة بالحزن والاكتئاب والضيق من المواقف السيئة
مراحل تكوين الإحساس بالألم داخل الجسم
- مستقبلاتنا العصبية اللي موجودة في كل حتة في الجسم بتحس بكل حاجة بنقرب منها وبنلمسها وبتقدر تحدد إذا كان الشيء ده مفيد أو مضر ليك
- على سبيل المثال لو ماسك إبرة خفيفة وطرفها في إيدك عمرك ما هتحس بألم، هتحس بطرفها ولكن الألم مش هيجي إلا لو ضغطت بقوة على إيدك باستخدامها
- هنا هتظهر مستقبلات الألم أو (Nociceptors) اللي بتحس بالضغط أو القوة اللي بتسبب ضرر لخلية في الجسم وبتوصل إشارات الألم للخلايا العصبية والحبل الشوكي وصولًا إلى المخ
- في اللحظة دي بيشتغل الجسم على الحماية من العدو والألم شيء غير مألوف وأول ما بتحس بيه بيفرز مواد كيميائية كتير بتغزو الخلية المصابة بتقلل نشاط مستقبلات الألم أو (Nociceptors)
- ولكن المواد دي بتفضل موجودة وهي اللي بتتسبب إنك لو لمست أي جرح ليك بعد دقائق منه هتحس بألم شديد جدًا ممكن يبقى في نفس قوة الألم وقت الجرح
- صناعة الأدوية المسكنة اللي بتخفف حدة الألم بتعتمد على منع إتحاد المواد الكيميائية اللي بتغزو الخلايا المصابة
- المسكنات منها اللي بتبطل مفعولها خالص وبتدمرها وبالتالي بتقلل الألم ومنها برضه اللي بتقلل مفعول وتأثير المواد دي لفترة بسيطة وبيرجع الألم يزداد حدة
تحاليل بتساعد على التشخيص
- صورة دم كاملة (CBC)
- تحليل فيتامين (د)
- تحاليل الغدة الدرقية
- تحليل العامل الروماتويدي Rheumatoid factor
- سرعة ترسيب كرات الدم الحمراء (ESR)
العلاج
- بعض تمارين العلاج الطبيعي بتساعد على المرونة وقوّة التحمّل والقوة الجسمانية ممكن تخفف الأعراض وتساعد على الشفاء
- الحديث مع طبيب نفسي للتخلص من مشاعر الحزن والضيق والاكتئاب بتقلل فرص الإصابة بالمرض وبتساعد على تخفيف إحساس الألم وأحيانًا العلاج منه
- أغلب الأطباء بيوصفوا مسكنات الآلام زي أدوية الباراسيتامول (Paracetamol) والبروفين (Ibuprofen) لكن باعتدال وتحت إشراف طبيب متخصص
- في الحالات الشديدة بتستخدم أدوية الاكتئاب في العلاج زي دولوكستين (Duloxetine) وميلناسيبران (Milnacipran)
- حافظ على التغذية المناسبة وقلل السكريات والدقيق الأبيض قدر المستطاع وكتّر من الألياف خصوصًا فيتامين A وفيتامين C وفيتامين E
- حافظ على الراحة قدر المستطاع وابذل مجهودك باعتدال ونظّم مواعيد نومك وتجنب تناول الكافيين خصوصًا أثناء الليل
