الفلاشة: الحفاظ عليها واسترجاع البيانات المفقودة وتعريفها على الكومبيوتر

الفلاشة من الأدوات الأساسية في أغلب الشركات والمؤسسات للاحتفاظ بالبيانات المختلفة في صيغة إلكترونية لسهولة تداولها بين الأجهزة، خصوصًا مع الضغط الشديد على شبكات الإنترنت، وأحيانًا بيحتاجها الطلاب لتخزين المواد الدراسية أو طباعة الأوراق اللازمة للمذاكرة أو لتسليم الأبحاث، وبالتالي ضروري تعرف طريقة الاحتفاظ بيها لأطول فترة ممكنة واسترجاع البيانات المفقودة أو المشفرة من فلاشة عليها فيروس.

الحفاظ على الفلاشة لأطول فترة 

•  بلاش تحتفظ بيها في أي مكان خصوصًا على سطح المكتب عشان بتزيد فرص سقوطها أو تعرضها للمياه
•  الأحسن تخصص لها علبة صغيرة وقت عدم استخدامها أو شيلها في الشنطة واعرف إن تلفها بيزيد لما بتحطها في جيبك بجانب إن الضغط عليها ممكن يكسرها بسهولة
• بلاش تسيبها في جهازك لو مش بتنقل بيانات منها أو إليها وحطها برفق داخل الجهاز وبلاش تضغط عليها
• الأحسن تنقل مستندات الـword على جهازك قبل تعديلها وخد نسخة من المستند في صيغته النهائية واعمل لصق/Paste على الفلاشة
• دوس على إخراج/eject قبل ما تخرّجها من جهازك وبلاش تحطها في جهاز مش واثق فيه
• نضفها باستخدام فرشة أسنان لأن تراكم الأتربة داخلها خصوصًا في الطرف المعدني ممكن يعطّلها
• برامج كتير بتحملها عشان توفر أكبر حماية للفلاشة من الفيروسات زي Eset و kingston Antivirus

طريقة استرجاع البيانات من فلاشة عليها فيروس 

•  افتح Start واكتب Cmd  عشان تظهر صفحة لونها أسود وفيها كلام مكتوب بالأبيض
•  اكتب فيها ( D:\>attrib -h -r -s /s /d*.* ) بس لازم تغير حرف الـ d حسب الحرف اللي ظاهر عندك بعد اسم الفلاشة
• انتظر لغاية ما ترجع البيانات اللي على الفلاشة تاني (ممكن تاخد وقت طويل بيوصل لـ 5 دقايق أو أكتر)
• بعض البرامج بتساعدك تسترجع الملفات المفقودة عليها زي Bitwar Data Recovery وEaseus وrecoverit 

حل مشكلة عدم تعريف الفلاشة 

• ممكن تبقى المشكلة في جهاز الكومبيوتر لكن لو المشكلة في الفلاشة نفسها في بعض الحالات تقدر بخطوات بسيطة تسترجعها تاني:
•  حط الفلاشة في مدخل الـ USB في الكمبيوتر
•  اضغط زر الفأرة الأيمن/ Right Click على My Computer
• اختار Properties ومنها حدد device manager اللي موجودة في القايمة على اليسار
•  دوس على علامة (+) الموجودة جنب usb serial bus controller
• اضغط  زر الفأرة الأيمن/ Right Click على علامة التحذير الصفراء اللي هتظهرلك
•  اختار Update driver واضغط على  automatically search for driver software online
•  اعمل Restart للجهاز بعد انتهاء التحميل قبل إدخالها مرة تانية
•  اتأكد من سلامتها أو فتحة الـ USB لأنهم ممكن يبقوا سبب في عدم تعريفها على الجهاز عشان تتجنب مشكلة عدم تعريفها