الصداع: أنواعه وأسبابه وطرق الوقاية منه

الصداع واحد من أكتر المشاكل الصحية اللي بتصيب الأشخاص، باختلاف السن أو الجنس، فهو ألم بيصيب أي جزء من الرأس أو على جانبيها أو جانب واحد بس، وممكن يبقى علامة على مشكلة صحية زي الأنيميا أو ضغط عصبي أو الاكتئاب.

أنواع الصداع

تنقسم أنواعه لمجموعتين أساسيتين وهم:

أعراض الصداع الأولي

هي أعراض لأمراض قائمة بحد ذاتها، وغير متعلقة بمشاكل صحية تانية، وبتكون نتيجة لمشاكل في بنية الرأس ونشاطها زي الأوعية الدموية والأعصاب والعضلات والرقبة، وتنقسم لأكتر من نوع:

صداع التوتر (Tension Headache)

هو من أكتر أنواع الصداع الأولية انتشارا، وبيبدأ تدريجيا وبيزيد على مدار اليوم، وبيستمر من 30 دقيقة لعدة ساعات، وبيصاحبه أعراض زي:

• ضغط حول الرأس وخلف العينين
• ألم في جانبي الرأس
• انتشار الألم من الجبهة للرقبة
• الحساسية من الصوت والضوء
• آلام وتيبس الرقبة
• بيحصل بسبب التعرض لمواقف سيئة أو ضاغطة وبتتكرر نوباته على مدار 15-30 يوم وتختفي بعدها

الصداع النصفي (Migraines)

المعروف بإسم الشقيقة، وبيستمر من عدة ساعات لـ3 أيام، وبيسبب ألم نابض في جانب واحد من الرأس وبيكون مصحوب بأعراض زي:

• عدم وضوح الرؤية
• الدوخة
• الغثيان
• ضعف العضلات
• صعوبة في الكلام
• تنميل الأطراف

أسباب الإصابة بيه غير معروفة لكن في بعض المسببات المحفزة ليه زي:

• الصوت العالي
• الضوء
• التغيرات الهرمونية
• القلق والتوتر
• النوم الكتير أو القليل
• الانسحاب من الكافيين
• شرب الكحول
• تفويت الوجبات
• أكل بعض الفواكه زي الأفوكادو والموز
• أكل الأجبان القديمة

الصداع العنقدوي (Cluster Headache)

بيستمر من 15 دقيقة لـ3 ساعات، وبيحصل فجأة من مرة لـ8 مرات يوميا ولمدة تتراولح بين أسابيع لشهور، وبيصاحبه أعراض زي:

• صداع في جانب واحد
• ألم شديد
• بيصيب عادة عين واحدة أو الأماكن حولها

صداع النوم (Hypnic Headaches)

من أنواع الصداع النادرة، وبيصيب الأشخاص أثناء النوم، وممكن يحصل أكتر من مرة على مدار الأسبوع، وبيصاحبه أعراض زي:

• ألم من خفيف لمتوسط في شكل نبض على جانبي الرأس
• الحساسية للضوء

أعراض الصداع الثانوي

هو عبارة عن الأعراض اللي بتظهر لما حالة مرضية تانية بتحفز الأعصاب الحساسة للألم في الرأس، أو بسبب وجود مشاكل صحية محفزة ليه زي:

• وجود ورم في الدماغ
• تناول الكحوليات
• جلطات الدم
• نزيف في الدماغ أو حوله
• تجميد الدماغ (صداع الآيس كريم)
• التسمم بأول أكسيد الكربون
• الجفاف
• ارتجاج في الدماغ
• الجز على الأسنان أثناء النوم أو في اليوم
• الإفراط في تناول المسكنات
• الإصابة بنوبات الهلع
• السكتات الدماغية
• الإنفلونزا
• في أنواع مختلفة من الصداع الثانوي، زي:

الصداع المرتد (Rebound Headache):

بيحصل بسبب الإفراط في تناول الأدوية أو أدوية علاج الصداع، وعادة بيبدأ في بداية اليوم وبيستمر لحد نهايته، وممكن يسبب:

• آلام الرقبة
• احتقان الأنف
• الأرق
• انخفاض جودة النوم

صداع الرعد (Thunderclap Headache)

• هو صداع حاد ومفاجيء وممكن يوصل لأقصى درجة من الشدة في أقل من دقيقة، وبيظهر في الحالات المرضية اللي بتهدد الحياة زي التجلط الوريدي الدماغي ونزيف المخ وتمدد الأوعية الدموية
• في حالة الإصابة بيه بشكل منتظم أو لفترات طويلة لازم تستشير دكتور فورا

صداع الجيوب الأنفية (Sinus Headaches)

• بتصاب بيه كأحد الأعراض المصاحبة لالتهاب الجيوب الأنفية وهو التورم الناتج عن عدوى بكتيرية أو حساسية داخل الجيوب الأنفية، وبيصاحبها أعراض زي:
• ألم خفيف حوالين العيون والخدين والجبهة وبيزيد مع الحركة والإجهاد
• الحساسية من الصوت والضوء
• إفرازات خضراء أو صفراء سميكة

الصداع المرتبط بالكافيين (Caffeine-related Headache)

في حالة تناول الكافيين بكميات كبيرة أو أكتر من 4 أكواب يوميا، أو في حالة الانسحاب منه، وتشمل أعراض الانسحاب:

• التعب
• فقدان التركيز
• تقلبات مزاجية
• الغثيان
• عادة الأعراض بتختفي بعد ساعة من شرب القهوة أو في خلال 7 أيام من الانحساب الكامل

التشخيص

• الصداع ممكن يكون عرض لمشكلة صحية بتمر بيها زي الأنيميا أو ارتفاع ضغط الدم وبتختفي أعراضه مع علاج المشكلة، وممكن يكون سببه المرور بفترة صعبة والإصابة بالاكتئاب والتوتر
• الدكتور بيقدر يشخص الحالة من خلال معرفة نوع الحالة والتاريخ العلاجي للشخص مع معرفة النظام الغذائي  وروتين الحياة
• بتشمل الاختبارات اللي الدكتور ممكن يطلبها منك تحاليل الدم والأشعة السينية ومسح الدماغ زي التصوير المقطعي والتصوير بالرنين المغناطيسي

طرق العلاج

العلاج بالأدوية

من السهل تعالج حالات الصداع بأدوية تصرف دون وصفة طبية زي:

• الأسبرين
• الأيبوبروفين
• الأسيتامينوفين
• أدوية مخصصة لأنواع معينة من الصداع لكن بتحتاج وصفة طبية
• في طرق علاج تانية تستهدف تقليل الصداع من خلال التخلص من الضغط العصبي زي العلاج بالتدليك وعلاج السلوك المعرفي

طرق طبيعية لعلاجه

• الاستحمام بمياه دافية
• وضع كمادة متلجة على أماكن الألم زي الرقبة والأكتاف والرأس
• تجنب محفزات التوتر سواء من الأطعمة أو الضغوط اليومية
• تناول الوجبات في مواعيد منظمة لتجنب خفض مستوى السكر في الدم
• ممارسة الرياضة بانتظام للتخلص من التوتر
• الاستراحة أثناء العمل لتجنب إرهاق العين والرقبة وعضلات الأكتاف

علاج الصداع بالمكملات الغذائية

بعض الأشخاص بيلجأوا لتناول المكملات الغذائية والأعشاب لتقليل أعراض الصداع زي:

• إنزيم Q10: تناول 100 مجم مرتين يوميا ممكن يقلل أعراض الصداع النصفي
• الانتظام على تناول مكملات الماغنيسيوم الغذائية أو الأطعمة الغنية بيه ممكن يقلل أعراض نوبات الصداع
• فيتامين ب12: تناول 200 مجم يوميا ممكن يساعد في تقليل أعراض الصداع