صحة نفسية
الشخصية النرجسية: كل اللي محتاج تعرفه عنها وطريقة التعامل معاها
إزاي تتعامل مع الشخصية النرجسية؟
المحتويات
الشحصية النرجسية حسب الإصطلاح هي الشخصية اللي بتهتم بنفسها بشكل كبير والإعجاب بشخصيتها وبشكلها، وبيمتد تأثير شخصيته عليه في كل النواحي سواء الشخصية أو العملية وممكن يبعد عنّه الناس ومع الوقت يصاب بالوحدة اللي ممكن تأثر عليه وتتفاقم أعراض جنون العظمة عنده.
تعريف الشخصية النرجسية
- اضطراب الشخصية النرجسية هو نوع من الاضطرابات اللي بتسبب حالة نفسية للمريض بيحس فيها بأهميته الزايدة
- بيزيد احتياجه لاعجاب الآخرين وتقديرهم المبالغ فيه مهما كانت تصرفاته غريبة أو مظهره مختلف
- بينعدم تعاطفه مع الآخرين وبيظهر للمحيطين بيه ثقة كبيرة في النفس ولكنها ثقة مزيفة
- بيتأثر بأقل انتقاد وبيحس بانعدام قيمته
- بتزيد مشاكله بين شركاء حياته وبتقل قدرته على تكوين الصداقات بسبب هوسه المستمر بذاته
- مش بيحسوا بالرضا عن علاقاتهم سواء العاطفية أو علاقات الزمالة والصداقة وبيفتعلوا المشاكل مع أي شخص بيحسوا بتميّزه
أعراض الشخصية النرجسية
- بيهتم بنفسه زيادة عن اللزوم ودايمًا معجب بمظهره
- بيدور على إعجاب وانتباه الناس وعلاقاته مع اللي حواليه مش مستقرة
- بيتلاعب في الكلام وبيتمنى زوال النعمة من غيره ومتوقع إن الآخرين بيبادلوه بنفس الشعور
- بيتكلم عن مواهبه وإنجازاته اللي جزء كبير منها وهمي طول الوقت
- بيحتقر أي حد أقل منه في المستوى الاجتماعي أو المادي أو حتى في القدرات العقلية ومش بيتعاطف معاه
- بيستغل الناس عشان يوصل للي عايزه
- متكبّر على الآخرين سواء أقل أو أعلى منه
- بيحب السيطرة عشان شايف إنه بيعمل أحسن حاجة
- بيرفض الاعتذار ومش بيعترف بأي خطأ
- النقد بيسببله توتر وغضب فبيقلل من الشخص اللي قدامه
- بيغضب لما اهتمام الناس بيه يقل
- بيدور دايما على الكمال في كل حاجة لأنه شايف نفسه كامل ومميز
- بيشتري دايمًا أحسن وأغلى حاجة حتى لو هيمر بعدها بأزمات مادية
- عنده مشاعر داخلية بالخجل وعدم الأمان والإهانة والضعف
تأثير الشخصية النرجسية على المحيطين
- بيزوْد قدرة الآخرين على التقاط أخطاء الآخرين والتعامل بنفس طريقته
- بيزوْد قلقهم واكتئابهم بسبب غياب مساحة الحوار وضرورة افتعال المشاكل بسبب أي اختلاف في وجهات النظر مهما كان بسيط
- بيغير وجهة نظرهم عن نفسهم ومع الوقت بتقل ثقتهم في قدراتهم وبيزيد التأثير لو قريّب منهم
- الدراسات بتقول إن التقرّب من شخص نرجسي بيضعف المهارات الاجتماعية لأنه بيحاول يستحوذ ويسيطر عليك لوحدك
- بتغيب الحدود الشخصية وبتزيد تدخلات النرجسي في حياة اللي حواليه لأنه مؤمن إنه صاحب رسالة وهدف لازم يحققه وإنه بيفهم أكتر منهم
- بيحاول بكل الطرق إلغاء وجود شخصية أو كيان لشريك حياته أو للمقربين منه عشان يستمر احتياجهم له
- بتوصل أحيانًا للابتزاز العاطفي عن طريق الخضوع والتذلل للوصول لأي هدف منهم أو حتى التهديد بالانتحار
- بيزوّد خوفهم من التعامل معاه ومع الوقت ممكن يوصل إنهم يخافوا يتعاملوا مع أشخاص تانيين بسبب تعاملاته القاسية معاهم
أسباب شعور شخص بالنرجسية
- عوامل وراثية بسبب الجينات
- أغلب اضطرابات نمو الشخصية معقدة وسبب ظهورها غير معروف بس ممكن تبقى بسبب خلل في بعض الروابط العصبية في المخ اللي بتأثر على الشخصية
- مشاكل في التربية بسبب علاقة غير طبيعية بين الابن أو الابنة والأب أو الأم سواء بالإعجاب المفرط أو الانتقاد اللاذع
التعامل مع الشخصية النرجسية
- قيم الموقف وشوف إذا كان لازم تتعامل مع الشخص ده فعلًا ولا لأ
- حط حدود واضحة في التعامل معاهم وبلاش تتكلم قدامهم عن حياتك طول الوقت
- خليك صريح واعترف قدامه بضيقك من سلوكه واطلب منّه التحكم في تصرفاته بس بطريقة دبلوماسية خصوصًا في البداية
- مثلًا ممكن تقوله على مميزات كتير في شخصية وبعدها تذكر العيوب وتقوله على طريقة لمواجهتها
- لو تمادى في سلوكه المريض الأحسن تتجاهله تمامًا وتبعده عن حساباتك
- اثبت على موقفك وبلاش تتراجع عنّه لأنه هيحاول يستعطفك ويتذلل ليك خصوصًا لو بعدت عنه
- بلاش تحس بالذنب افتكر إنك لو منحته الاهتمام المطلوب هيتمادى في سلوكه وهتسوء حالته أكتر
- اتعامل مع أي وعد على إنه مجال للشك لأنه دايمًا بيستميل الشخص اللي قدامه عشان يحقق أغراضه
- خليك إيجابي ومبتسم أثناء مواجهته ليك عشان يتأكد إن غياب سلوكه المسيطر مش هيأثر عليك بالسلب
- افصل نفسك عن كلامه ونصايحه طالما واثق من نفسك وحاوط نفسك بأشخاص إيجابيين
- لازم تلغي علاقتك بيه فورًا لو بيوجهلك إهانات أو بيحمّلك مسؤولية أي فشل وبيسقط عيوبه كلها عليك
- اتمسك دايمًا بدوايرك الآمنة حتى لو مضطر تستمر في علاقة معاه لأنه هيحاول بكل الطرق يبعدك عن أقرب الناس ليك عشان يسهّل على نفسه مهمة السيطرة عليك
قدرة الشخصية النرجسية على النجاح
- الدراسات بتأكد قدرته على تحقيق النجاح والوصول إلى أعلى المراتب
- دراسة في جامعة كوينز بلفاست البريطانية بتقول إن صفاتهم بتديهم ثقة في نفسهم وجزء كبير منهم بيسعى للتميز وبيبذل كل طاقته في سبيل تحقيقه
- إحساس العظمة والنجاح بيخليهم متأكدين من هدفهم وإصرارهم بيزيد حتى لو فشلوا لأن الفشل بالنسبة لهم كسر للأنا عندهم
- بيكتئبوا لفترة بسيطة ولكن بتدفعهم للمحاولة والاستمرار مهما كان التمن
- حبهم لجذب الانتباه بيخليهم دايمًا يسعوا للأحسن للفخر بنفسهم وبقدراتهم
- دراسة بريطانية اكتشفت إن الطلاب النرجسيين بيسجلوا درجات دراسية أعلى من غيرهم وبتأكد إن رغم تسلطهم في مواقف كتير ولكن بتزيد مرونتهم لتحقيق أهدافهم
- بس ده بيساعدهم فقط للوصول للهدف اللي عايزينه لكن مع الوقت ممكن ينكشف طبيعة سلوكهم
- المراتب العليا بيزيد رسوخها مع الوقت عن طريق العلاقات الطيبة مع المحيطين
التسلط وحب الذات والإحساس الزايد بتحقيق الهدف ممكن يدفع الشخص لتصرفات غير مسؤولة يضيع بيها كل اللي بناه
العلاج
- بيعتمد علاجها على المحادثة والكلام مع المريض من خلال طبيب نفسي متخصص
- لازم يبقى الشخص مؤمن من داخله إنه مصاب بالاضطراب ده عشان يبدأ علاج صح
- بيساعده العلاج مع الوقت على فهم أسباب الانفعال وتحسين مهارات التواصل مع المحيطين
- بيتقبل تكوين شخصية اجتماعية متعاونة مع المحيطين وبيتدرب على التعاطف معاهم
- بيساعده العلاج على فهم نفسه بطريقة صحيح وتحديد المميزات والعيوب بكل صدق
