المحتويات
السكر التراكمي هو تحليل بيقيس معدل السكر خلال الشهرين أو الـ 3 شهور السابقين، وبيعتبر جرس إنذار للتحذير سواء من اقتراب الإصابة بمرض السكر أو حتى تأكيد الإصابة بيه، وممكن يبقى الدافع للوقاية من أي مضاعفات على الصحة سواء بالاتزام بنظام حياة صحي، أو بتعديل جرعة الدواء.
تعريف السكر التراكمي
- بيتعرف باسم الهيموجلوبين السكري (Glycated Hemoglobin) أو (HbA1c)، وبيحصل لما بيتراكم الجلوكوز في مجرى الدم
- بتقل قدرة الخلايا على امتصاصه بسبب تدمير خلايا بيتا ( Beta Cells) المسؤولة عن إنتاج الأنسولين اللي بيساعد الخلايا على امتصاص الجلوكوز (في النوع الأول من السكر)
- في أوقات تانية بيحصل بسبب حساسية الخلايا للجلوكوز والأنسولين ورفض الخلايا امتصاصهم وبالتالي بيتراكم الجلوكوز في مجرى الدم (النوع التاني من السكر)
- بيتحد مع كرات الدم الحمراء (RBC) اللي بتتجدد كل شهرين لـ 3 شهور، ومن خلال فحص عينة من الدم نقدر نعرف كمية السكر التراكمي خلال شهرين لـ 3 شهور سابقين
- ارتفاعه زيادة عن اللزوم معناه زيادة الخطر على الأوعية الدموية وزيادة فرص الإصابة بأمراض القلب والعيون وتلف الأعصاب خصوصًا في الأطراف
قياس السكر التراكمي
- 4 % لـ 5.6%: الشخص طبيعي ومش مصاب بمرض السكر
- 6 % لأقل من 7%: فرص أعلى للإصابة بالسكر
- 7 % لـ 9 % : الشخص مصاب بمرض السكر
- 10 % لـ 14% : مفيش سيطرة على نسبة الجلوكوز في الدم لمريض السكر
النسبة المستهدفة من مرضى السكر وقت قياسه
- الحفاظ على نسبة 7% أو أقل هو هدف المصابين بالسكر وقت قياس السكر التراكمي
- النسبة دي بتدل على انخفاض مستوى الجلوكوز لأقل مستوى متناسب مع الحالة الصحية للمريض
تكرار فحص السكر التراكمي
- بيقيس المرضى السكر التراكمي بناء على طلب الطبيب كل 3 لـ 6 شهور حسب الحاجة، وممكن تحصل لفترات أقرب عند السيدات أثناء الحمل أو وقت التخطيط له
عوامل مؤثرة في تغير نسبة الفحص
- عدم الالتزام بنظام حياة صحي والإفراط في تناول السكريات والنشويات
- تناول بعض الأدوية اللي بتأثر على مستوى السكر في الدم
- تغيير في نمط الحياة ومواعيد الأكل ونوعيته
- التوتر المستمر والضغط النفسي والاكتئاب
- التدخين باستمرار أو الجلوس بجانب مدخنين والتعرض المستمر للتلوث
طرق خفض مستوى السكر التراكمي
- غيّر نمط حياتك خصوصًا في الأكل واتحرك كتير كل يوم
- الدراسات بتأكد إنك لازم تلعب رياضة 30 دقيقة يوميًا 5 مرات في الأسبوع، والمهم تتحرك ومش لازم تلعب رياضة عنيفة فيها مجهود بدني عالي
- حافظ على وجبات غذائية متوازنة فيها خضروات، فواكه وبروتينات وقلل النشويات زي العيش والأرز لأنهم بيتحولوا لسكر في الجسم
- ابعد عن المأكولات المصنعة والمشروبات الغازية والحلويات
- احسب السعرات الحرارية المناسبة لتثبيت وزنك وقللها يوميًا عشان تقلل وزنك خصوصًا لو بتعاني من السمنة
- ثبّت مواعيد الأكل والشرب واشرب مياه كتير خلال اليوم (مش أقل من 3 لتر يوميًا)
- خلي فيه فاصل بين الوجبات مش أقل من ساعتين
- استشير طبيب متخصص فورًا لو لقيت نسب التحاليل سواء تحاليل السكر العادية أو التراكمي مش طبيعية والتزم بتعليماته
التدخل الدوائي
- مهم تختار دكتور بتثق فيه عشان يختار دواء مناسب لحالتك، مع مراعاة حالتك الصحية إذا كنت مصاب بأمراض تانية ومن الأدوية دي:
- (ميتفورمين) اللي بيعتبر الخيار العلاجي الأول لمرضى السكري، لأنه بيقلل إنتاج الجلوكوز في الكبد، وبيزوّد حساسية الجسم للأنسولين، ولكن من أعراضه الجانبية الغثيان، والإسهال.
- (سلفونيل يوريا) وده من ضمن مجموعة الأدوية اللي بتساعد على إفراز الأنسولين من الجسم
