التوحد والتغذية: المشاكل اللي بيواجهها المصاب وطرق التعامل معاها
إزاي تهتم بتغذية مصابي التوحد؟
التوحد والتغذية بينهم علاقة قوية، فالتوحد هو مجموعة من الاضطرابات المعقدة في النمو العصبي بالدماغ، وينتج عن الإصابة بيه مواجهة صعوبات في التواصل مع الآخرين والتفاعل في المجتمع، وضعف المهارات اللغوية والسلوكية
ومن ضمن خطوات التعامل معاه هو فهم النظام الغذائي الأنسب للمصابين بيه للمساعدة في تحسين الأعراض.
التوحد والتغذية
الأشخاص المصابة بالتوحد بيواجهوا صعوبات كتير زي عدم القدرة على الاتصال البصري وعدم تحمل لمس الآخرين ليهم وتأخر النطق أو النمو اللغوي وقلة الأشياء اللي بيهتموا بيها
والسلوك ده بيأثر على اختياراتهم وتفضيلاتهم في الأكل، واللي ممكن يسبب صعوبات زي:
- قلة اختيارات الأكل اللي بيحبها، وده بسبب الحساسية من شكل أو طعم أو رائحة أطعمة معينة، أو كره أطعمة معينة بسبب إن ملمسها غير مريح بالنسباله
- قلة الأكل بسبب إن المصاب بيواجه صعوبة في التركيز لمدة طويلة وإنهاء مهمة معينة للآخر، وبالتالي بيتحرك كتير أثناء الأكل
- الإمساك بسبب قلة اختيارات الأكل أو الانتظام على بعض الأدوية أو قلة الحركة
- وممكن يتعالج بإدخال الأطعمة الغنية بالألياف في نظامه الغذائي زي الفواكه والخضار، مع الاهتمام بالحركة البسيطة اليومية وشرب سوايل كفاية
- تأثير الأدوية، فالبعض منها بيسبب سد الشهية وأنواع تانية بتسبب فتح الشهية أو بتأثر على امتصاص العناصر الغذائية والفيتامينات في الجسم
طرق التعامل مع صعوبات التغذية
النظام الغذائي المتوازن خطوة مهمة جدا للتعامل مع أعراض التوحد، لأنه بيأثر على نموه وقدرته على التعلم والتعامل مع مشاعره وطريقة فهمه للمعلومات
وبسبب حركة المصاب المستمرة وقلة اختيارات الأكل اللي بيحبها، هتحتاج بعض الخطوات للتعامل معاه، زي:
- الطفل المصاب بيكون حساس تجاه أطعمة معينة بسبب الملمس أو الطعم أو شكلها، وإجباره على أكلها هيكون مستحيل
- وعشان تقدر تشجعه على إدخال طعام جديد في نظامه الغذائي خليه يشاركك مرحلة التسوق من السوبرماركت بإنه يختار طعام جديد يجربه
- وبعدين حمسه بإنكوا تعملوا سيرش على طرق زرع الطعام ده على الإنترنت والأساليب والوصفات المختلفة لطبخه، وخليه يساعدك في تجهيزه
- تجنب العصبية أو الحزن في حالة رفضه لأكله بعد كل الخطوات دي، فمهم تكون هادي وتجنب الضغط عليه عشان ياخد وقته في التعود على الطعام الجديد
- الروتين من الخطوات المهمة، فتحديد مواعيد للوجبات وتثبيتها يوميا هيقلل رفضه للأكل أو شعوره بالتوتر
- راقب تصرفاته عشان تقدر تحدد محفزات القلق عنده أثناء الاكل زي الصوت العالي والأنوار الكتير لتجنبها
- ممكن تحمسه بإنك تخليه يختار حاجة جديدة يضيفها لوجبته كل فترة
- استشير أخصائي تغذية متخصص لحالات التوحد عشان تقدر تعرف النظام الغذائي الأنسب لحالة طفلك
- فمثلا طرق زي منع الجلوتين أو منتجات الألبان لا ينطبق على كل الحالات، وبيختلف أثره من شخص للتاني، ده غير إن الدراسات غير داعمة بشكل كامل لمنعهم
- اتباع نظام غذائي مع شخص متخصص هيساعدك تتوقع الصعوبات اللي ممكن تواجهها كل فترة مع الطفل المصاب وإزاي تتعامل معاها
- لأنه هيقدملك طرق التغذية العلاجية الأنسب لحالته والفيتامينات اللي ممكن ياخدها بدون تعارض مع أدويته
الممنوعات عن المصابين بالتوحد
بعض التغييرات الغذائية هتساعد في تطور حالة الطفل وتقليل انحدار أعراض الاضطراب زي:
- تجنب الأطعمة أو المشروبات اللي فيها إضافات صناعية زي الألوان والسكر الصناعي
- التركيز على الأطعمة السليمة زي الخضار والفاكهة والاسماك واللحوم الخالية من الدهون
- الأطعمة اللي فيها دهون غير مشبعة مفيدة زي الأفوكادو وزيت الزيتون وزيت الكانولا والمكسرات زي اللوز
- شرب مياه سوايل صحية بكمية كافية
- بعض الأشخاص قالوا إن منع الجلوتين أو الأطعمة اللي بتحتوي عليه زي العيش والمكرونة ليه نتايج إيجابية
- لأن الجلوتين بيسبب التهاب الجسم وزيادة أعراض الاضطراب عند الطفل، ولكن لا توجد دراسات كافية لإثبات النقطة دي
- أشخاص تانية اتكلموا عن التأثير الإيجابي منع مادة الكازين (البروتين اللي بيستخرج من الحليب) على المصابين، ولكن الدراسات حوالين النقطة دي قليلة جدا
