التوحد: أعراضه وأسبابه وتشخيصه وطرق العلاج

التوحد Autism هو أحد الاضطرابات التابعة لمجموعة من اضطرابات التطور اسمها اضطرابات في الطيف الذاتوي (Autism Spectrum Disorders)، وأعراضه بتظهر في الأغلب في سن الرضاعة أو قبل إتمام الطفل 3 سنين.

ما هو اضطراب التوحد؟

• هو عبارة عن حالة بترتبط بنمو الدماغ وبتأثر على كيفية تمييز الشخص للآخرين والتعامل معاهم على المستوى الاجتماعي، وبيسبب مشاكل في التعامل والتفاعل الاجتماعي، ويتضمن الاضطراب أنماط محدودة ومتكررة من السلوك
• الاضطراب ليه مجموعة كبيرة من الأعراض والمستويات وبتختلف من شخص للتاني، إلا إن كلها بتأثر على قدرة الطفل على التواصل مع الآخرين
• غالبا بتظهر أعراضه في السنة الأولى من عمر الطفل، فتطور النمو بيكون طبيعي وبعدين بيمر الطفل بفترة من الارتداد ما بين سن 18 شهر وسنتين لما بتظهر عليه أعراض التوحد
• بالرغم من إن لا يوجد علاج للتوحد إلا إن التشخيص المبكر والاهتمام بالموضوع بالطريقة الصحيحة عند ظهوره بيساعد في تطور الطفل بشكل كبير

أسباب الإصابة بالتوحد

لا يوجد سبب أساسي أو مؤكد للإصابة بيه، لكن بسبب تعقيدات المرض ومدى اضطرابات الذاتوية وحقيقية انعدام التطابق بين حالتين، فممكن يكون في أسباب للإصابة بيه زي:

أسباب وراثية

• الباحثين اكتشفوا وجود مجموعة من الجينات اللي ممكن تكون سبب في الإصابة بيه، وممكن تأثر على نمو الدماغ وتطوره وطريقة اتصال خلايا الدماغ ببعضها
• الخلل الوراثي مسؤول عن الإصابة بعدد من الحالات الذاتوية لأن الجينات ليها تأثير أساسي عليه
• معاناة شخص من العائلة أو من الأقارب بيه بيزود نسبة الإصابة

أسباب بيئية

• بعض الأبحاث اكتشفت دور التلوث- الهواء بشكل مخصوص- والتعرض لملوثات الجو سبب للإصابة بيه
• وجود تاريخ من العدوى الفيروسية ممكن يسبب الإصابة بيه

أسباب تانية

• في حالة الإنجاب والأب والأم في سن كبير
• ولادة الطفل بوزن صغير
• وجود مشاكل في الولادة أو الولادة قبل اكتمال الحمل
• إصابة جزء من الدماغ اسمة اللوزة Amygdala من أحد العوامل المحفزة للمرض
• جنس الطفل، فالدراسات أثبتت إن احتمالية إصابة الأطفال الذكور أعلى 3 مرات من إصابة الأطفال البنات
• المعاناة من مشاكل طبية زي متلازمة كروموسوم X الهش (متلازمة موروثة بتسبب خلل ذهني) أو التصلب الحدبي اللي بيسبب تكون وتطور أورام في الدماغ أو الصرع

أعراض التوحد

الأطفال المصابة بيعانوا من الأعراض في 3 مجالات أساسية وهي:

1. المهارات الاجتماعية
2. اللغة
3. السلوك

وبسبب اختلاف الأعراض وحدتها بين كل طفل والتاني، فممكن الطفلين يكونوا بنفس التشخيص إلا إن تصرفاتهم فيها اختلاف، وممكن تظهر الأعراض في فترة الرضاعة أو الطفل يكون بيتطور بصورة طبيعية وفجأة ينغلق على نفسه ويفقد المهارات اللغوية والاجتماعية اللي اكتسبها

المهارات الاجتماعية

• لا يستجيب لمناداة اسمه
• قليل الاتصال البصري
• بيظهر عليه علامات عدم إنصات للشخص اللي بيتكلم
• بيرفض العناق ومنكمش على نفسه
• بيظهر عليه عدم إدراك أو فهم مشاعر الآخرين
• بيفضل يلعب أو يقعد لوحده

المهارات اللغوية

• بيبدأ الكلام أو نطق كلمات بسيطة في سن متأخر
• بيفقد القدرة على نطق كلمات أو جمل معينة كان قادر على نطقها
• صعب يمارس اتصال بصري متواصل وبيختار الوقت اللي عايز يمارسه فيه
• بيتكلم بصوت غريب أو بنبرات وإيقاعات مختلفة زي الصوت الغنائي أو الوتيري
• غير قادر على بدء محادثة أو الاستمرار فيها
• بيكرر كلمات أو عبارات معينة ولكنه لا يعرف كيفية استعمالها

السلوك

• بيعمل حركات متكررة زي هز جزء من جسمه أو تحريك إيده
• بيمارس عادات معينة وبيكررها دايما
• أي تغيير في روتينه اليومي مهما كان بسيط بيزعجه
• بيتحرك دايما
• سهل ينبهر بأجزاء معينة من الأدوات زي لف جزء معين من اللعبة
• شديد الحساسية لأبسط الأشياء زي النور والصوت واللمس
• عنده تفضيلات خاصة بيه في الأكل وبيتجنب أطعمة معينة لأسباب زي إن ملمسها غير مريح ليه

أعراض التوحد حسب المرحلة العمرية

الأطفال أقل من سنة

• عدم إصدار الأصوات في سن 4 شهور
• صعب يبتسم أو يضحك بين 5-6 شهور
• عدم التفاعل مع الألعاب في سن 8 شهور
• لا يلتفت لاسمه أو حاجات بتشاورله عليها لما يتم سنة
• الصوت العالي بيزعجه ومش بيتفاعل مع الأهل خاصة في مواقف جديدة عليه
• صعوبة التواصل البصري معاه والاستمتاع باللعب لوحده فترات طويلة 

الأطفال من سنة لسنتين

• تأخر الكلام خاصة كلمات مهمة وبسيطة زي ماما وبابا وعدم القدرة على استخدام جمل بسيطة
• لما بيتكلم.. بيقول كلمة واحدة كل مرة
• تكرار السلوك أو نفس الكلمات كتير
• عدم الاهتمام بالألعاب الجماعية
• صعوبة التواصل البصري
• عدم الاهتمام بتقليد اللي حواليه زي أقرانه في الفترة دي
• دراسة بتقول إن 25-30% من أطفال التوحد قدرتهم للكلام بتطور في سن السنة ونص وبيفقدها بعد كده

الأطفال من 2 لـ5 سنين

• صعوبة التعبير عن نفسه وفهم مشاعر وتعبيرات الآخرين
• عدم الاهتمام بالألعاب الجماعية والاستمتاع باللعب لوحده وبلعبة معينة
• تكرار الكلام وخاصة كلام الناس حواليه
• عدم تطور مهاراته اللغوية والكلام بنبرة صوت غريبة
• استخدام كلمات وتعبيرات معينة خاصة بيه
• صعوبة تعلم دخول الحمام
• سلوكه بيميل للعنف والتحدي زي خبط دماغه في الحيطة أو جرح جلده

 في حالات بتكتشف بين دخول المدرسة لحد مرحلة المراهقة

• الاهتمام بيوصل للهوس بحاجة معينة
• صعوبة التواصل البصري ومع الناس حواليه وبيفضل يكون لوحده
• عدم قدرته للتعبير عن نفسه بسهولة أو فهم مشاعر الآخرين
• بيتجنب التلامس الجسدي بأشكاله المختلفة زي الحضن
• تكرار السلوك وتفضيل الروتين والتنظيم والقوانين وبيتعصب من تغييرهم
• بيمر باضطراب النوم وبيحب حاجات معينة في الأكل واللبس والأدوات
• دراسة بتقول إن 25-50% من المصابين بيمروا بصعوبة في تطور مهارات التواصل اللغوي عندهم

 العلاقة بين التوحد والتطعيمات

بالرغم من الدراسات المتعددة عن لو في علاقة بين التطعيمات اللي بيتلقاها الطفل في المراحل المبكرة من عمره والإصابة بالتوحد، إلا إن لا توجد دراسة واحدة لإثبات وجود علاقة بينهم، ولكنها أثبتت أهمية تلقي التطعيمات للوقاية من الأمراض الخطيرة زي الحصبة وشلل الأطفال

 تشخيص اضطراب التوحد

• في حالة ظهور أي من الأعراض السابقة، لازم تروح لدكتور متخصص لعلاج التوحد لإجراء فحوصات منتظمة للنمو والتطور للكشف عن تأخر النمو عند الطفل
• بسبب تعقيد الاضطراب واختلاف حدة الأعراض بين شخص والتاني، فالدكتور بيحتاج وقت ومراقبة على فترات كبيرة للتشخيص الصحيح
• الدكتور هيحتاج يقعد مع الأبوين عشان يسألهم عن تفاصيل متعلقة بالطفل زي مهاراته الاجتماعية واللغوية والسلوكية وتطورها مع الوقت
• الطفل هيخضع لاختبارات وفحوصات تختبر قدراته اللغوية والكلامية وفحص بعض الجوانب النفسية
• في بعض الأحيان التشخيص النهائي بيكون عند بلوغ الطفل 3 سنين للتأكد من وضوح واستمرار الأعراض
• التشخيص المبكر مهم جدا لتحقيق أفضل احتمالات تحسن الحالة وتجنب انحدارها

علاج اضطراب التوحد

لا يوجد علاج صريح ليه، لكن في مجموعة من العلاجات والطرق اللي بيتم ممارستها مع الطفل في البيت والمدرسة المخصصة والطبيب لتطوير حالته وده من خلال:

• العلاج السلوكي Behavioral Therapy
• علاجات أمراض النطق واللغة Speech-Language Pathology
• العلاج التربوي والتعليمي
• العلاج الدوائي

العلاجات البديلة

تعتمد العلاجات البديلة على:

• كمية عالية من الفيتامينات
• نظام غذائي خاص بالطفل مناسب لحالته واللي بعض الأهالي اجمعوا على أهميته وفعاليته للطفل المصاب
• تناول الميلاتونين لحل مشاكل النوم
• بالرغم من لجوء بعض الأهالي لطرق العلاج دي إلا إن لا يوجد رأي واضح أو أبحاث تثبت صحتها

التوحد وممارسة الرياضة

• بعض أنواع الرياضة هتساعد الطفل على تقليل حدة الأعراض والشعور بتحسين الحالة الصحية العامة
• أي نوع من النشاط الجسدي مفيد ومؤثر زي المشي واللعب في مكان مفتوح
• السباحة مفيدة لتمرين الجسد ومن أحسن الأنشطة لتحفيز حواس عند طفلك