التهاب الامعاء: أعراضه وأسبابه ونصائح للتعامل مع الإصابة

التهاب الامعاء أو داء الأمعاء الالتهابي هو مصطلح شامل لوصف الاضطرابات اللي بيحصل فيها التهاب مزمن في الجهاز الهضمي وبيشمل التهاب القولون التقرحي وداء كرون.

المرض بيسبب أعراض متاشبهة في الحالتين ومضاعفات خطيرة ممكن توصل لانسداد الأمعاء

أعراض التهاب الامعاء

بتختلف حسب مكان الالتهاب وشدته فتتراوح بين خفيفة لشديدة، وفي فترات بينشط فيها المرض وتمر فترات تانية من الهدوء

تشمل الأعراض:

• الإسهال
• الإرهاق
• ألم وتقلصات في البطن
• فقدان الوزن غير المبرر
• دم في البراز
• فقدان الشهية
• الغثيان والتقيؤ
• الحمى
• الصداع المستمر

أسباب الإصابة بالتهاب الامعاء

• السبب وراء الإصابة بداء الأمعاء الالتهابي غير محدد، فالتوتر والنظام الغذائي بتزود أعراضه وشدتها لكنها مش سبب واضح
• من الأسباب المحتملة هي وجود خلل في الجهاز المناعي لأنه بيحاول يحارب بكتيرا أو فيروس، فالاستجابة غير الطبيعية للجهاز المناعي بتخليه يهاجم الخلايا الجيدة في الجهاز الهضمي
• الوراثة ليها تأثير لأنها بتزود فرص الإصابة بيه

المضاعفات

في حالة إهمال الإصابة بداء الأمعاء الالتهابي، بتحصل مضاعفات خطيرة للجسم زي:

زيادة فرصة الإصابة بسرطان القولون

التهاب الجلد والعين والمفاصل، لأن الإصابة بيه ممكن تحصل اضطرابات للجسم زي التهاب المفاصل والفطريات الجلدية والتهابات العين

زيادة خطر الإصابة بالجلطات الدموية 

انسداد الأمعاء لأنه بيأثر على السماكة الكاملة لجدرانها

سوء التغذية

لأن آلام البطن وتقلصات المعدة بتأثر على تناولك الأكل بشكل منتظم أو على الأمعاء إنها تمتص العناصر الغذائية بشكل سليم وبالتالي بتزيد احتمالية الإصابة بالأنيميا ونقص الفيتامينات

الناسور

لأن الالتهاب بيمتد عبر جدار الأمعاء بالكامل وده ممكن يسبب حدوث ناسور وهو عبارة عن اتصال غير طبيعي بين أجزاء الجسم المختلفة

الجفاف الشديد

بسبب الإسهال المفرط

تضخم القولون

لأن التهاب القولون التقرحي بيسبب توسعه وانتفاخه بسرعة

حدوث ثقب

في الأمعاء أو القولون

أشياء لا يمكن الاستغناء عنها في حالة الإصابة بالتهاب الامعاء

التعايش مع الإصابة بيه صعبة، مش بس بسبب الإرهاق ومضاعفات الجهاز الهضمي، لكن بسبب تغير شدة الأعراض المفاجىء واحتياج الحمام بشدة في أي وقت

في أشياء معينة هتسهل عليك التعايش معاه أثناء العلاج زي:

سبراي الحمام

لأنه بيسبب رائحة براز كريهة وظاهرة وبالتالي هتحتاج سبراي قوي يقلل من رائحة المكان بعد استخدامه خاصة لو بتزور حد

منظم الأدوية

العلاج بيحتاج أدوية كتير وفي مواعيد محددة ومتابعدة، وبالتالي استخدام منظم الأدوية هيساعدك تاخد كل دواء في معاده بشكل منظم في أي مكان

البيجامات المريحة والواسعة القطنية 

الاصابة هتسبب لك عدم ارتياح وقلة القدرة على الحركة معظم الوقت، وبالتالي مهم تكون لابس ملابس مريحة وتساعدك على الاستلقاء بسهولة

المخدة على شكل دونات

هتساعدك تقعد بارتياح لأنك ممكن تحس بآلام في الجزء الأسفل من الجسم

المشروبات المدعمة بالمعادن

الإسهال الشديد والمتكرر بيسبب جفاف الجسم وبيأثر على صحتك بشكل عام فمهم تعوض السوايل بالطريقة المناسبة لتجنب المضاعفات الخطيرة