المحتويات
المستكة من الإضافات المميزة لأي أكلة، لأنها بتدي نكهة مختلفة ومميزة، بتستخدم في كتير من وصفات اللحوم والحلويات والمعجنات والآيس كريم، وكمان لها فوايد صحية وبتساعد في الوقايه من أمراض كتيرة، بجانب فوايدها للشعر والبشرة.
فوايد المستكة الصحية
- بتساعد في التخلص من عسر الهضم وأعراضه المزعجة زي الانتفاخ والغازات والغثيان والتقيؤ وحرقة المعدة
- الدراسات قالت إن تناول المستكة مفيد للمصابين بالمشاكل الهضمية، لأنها بتتحول لسايل صمغي في البيئات الحمضية بيساعد في حماية خلايا القناة الهضمية
- كمان لأنها بتحتوي على خصائص طبيعية مضادة للأكسدة وللبكتيريا بتساعد على تخفيف حدة الأعراض المرافقة لعسر الهضم
- تناول المستكة بيساعد على التخلص من ريحة الفم الكريهة، لأنها بتحتوي على مضادات الأكسدة وبتساعد على التخلص من البكتيريا المسؤولة عن التهاب دواعم السن والتهاب اللثة والتسوس
- لها قدرة على خفض مستويات الكوليسترول السيء، وكانت الدراسات أثبتت إنها بتساعد في خفض فرص إصابة الأوعية الدموية والقلب بأي تلف أو ضرر بسبب ضغط الدم المرتفع
- بتحتوي على مضادات للأكسدة بتساعد في تقليل خطر الإصابة بالسرطان، خاصة سرطان الرئة والبروستاتا
- تناولها بيساعد في التخلص من انتفاخات القولون والغازات وتقليل آلام القولون وتهيجه، والوقاية من سرطان القولون
- لها دور فعال في حرق الدهون الثلاثية المتراكمة المسؤولة عن ارتفاع نسبة الكوليسترول والإصابة بالسمنة وخاصة في مناطق الفخدين والبطن والأرداف
فوايد المستكة للبشرة
- بتساعد على الوقاية من الإصابة بالتجاعيد المبكرة، لأنها يتحتوي على مضادات الأكسدة اللي بتحمي البشرة من الجذور الحرة
- بتحفز إنتاج الكولاجين الضروري للحفاظ على شباب الجلد
- بتحتوي على مضادات الميكروبات والبكتيريا ولها دور في التخلص من حب الشباب
- بتشد البشرة وبتقلل المسام الواسعة
- اخلط معلقة كبير مستكة في كوباية مياه مغلية وقلب لحد ما تدوب.. سيبها منقوعة طول الليل، وامسح البشرة بقطنة مبللة بالخليط مرتين يوميا، واحفظها في التلاجة
فوايد المستكة للشعر
- بتساعد على تحفيز الدورة الدموية في فروة الرأس، وبتقلل تساقط وتقصف الشعر
- بتزود لمعان الشعر وتقويته من الجذور ولحد الأطراف وبتنعمه
- اغسل الشعر بمنقوع المستكة مرتين في الأسبوع
استخداماتها المختلفة
- إضافتها مع تحويجة القهوة التركي
- ضمن تتبيلات الفراخ المختلفة والأرز
- مضغها مطهر ومعطر للفم
- إضافتها للبخور للتخلص من الروايح الكريهة في البيت
- تستخدم المستكة في صناعة أغلب أنواع الأيس كريم أو البوظة
- ضيفها لعصير الليمون لإضافة نكهة مميزة
محاذير استخدامها
- تجنب الحوامل والمرضعات والأطفال اسخدامها
- تجنب تناولها مع الأدوية لأنها بتتداخل بشكل سلبي
- الأشخاص اللي بيعانوا من حساسية تجاه الفسدق أو الكاجو.. تجنبوا تناولها لأنها هتأدي لرد فعل تحسسي زي ضيق التنفس والطفح الجلدي
وصفات مختلفة بالمستكة
الآيس كريم
المكونات
- معلقة صغيرة بودرة مستكة
- 4 كوبايات لبن
- كوباية ونص سكر
- معلقة كبيرة ونص سحلب
- 250 جرام قشطة
- 4 معالق كبار مياه ورد
- كوباية فسدق مجروش
الطريقة
- اخلط 3 كوبايات لبن مع السكر وارفعهم على نار متوسطة لحد ما يغلي
- في الخلاط الكهربائي.. اخلط السحلب مع باقي كمية اللبن
- ضيف الخليط السابق لخليط اللبن والسكر مع التقليب
- بعد ما قوام الخليط يتقل.. ارفعه من على النار وضيف المستكة وقلب لحد ما تدوب تماما
- بعد ما الخليط يبرد .. ضيف القشطة ومياه الورد واخلطهم مرة تانية في الخلاط الكهربائي
- ضيف الفسدق وقلب كويس ودخله الفريرز لمدة 4 -5 ساعات
المهلبية
المكونات
- نص معلقة كبيرة مستكة مطحونة
- 3 كوبايات لبن
- كوباية كريمة
- ربع كوباية سكر
- ربع معلقة صغيرة حبهان مطحون
- 4 معالق أرز مطحون
- 4 معالق كبار نشا
- معلقة كبيرة مياه ورد
الطريقة
- اخلط السكر مع الكريمة واللبن والحبهان والأرز والنشا والمستكة على نار متوسطة
- حافظ على تقليب مستمر لحد ما يبقى خليط متماسك وقوامه سميك
- وزع المهلبية في بولات ودخلها في التلاجة بعد ما يبرد
