المحتويات
رخصة القيادة ضرورية لقيادة سيارتك بأمان بدون أي مشكلات لأن قيادتك من غيرها ممكن تبقى السبب في تعرضك لعقوبة قانونية، وكمان مهم تعرف الورق المطلوب منك وتكلفتها قبل التوجه للمرور عشان تبقى جاهز لأي موقف سواء في الإجراءات أو وقت اختبار القيادة.
الرسوم المطلوبة لإصدار رخصة القيادة
- أغلب الرسوم بتتقسم على قيمة المستندات والإجراءات اللي هتمر بيها وتقدر تشتريها من إدارة المرور التابعة ليك
- رسوم الكشف الطبي وتحديد فصيلة الدم حوالي 285 جنيه
- الضريبة شاملة التأمين وتنمية موارد الدولة حوالي 615 جنيه
- نموذج 256 لطلب الرخصة ثمنه حوالي 6.5 جنيه
- نموذج اختبار إشارات المرور بـ 10 جنيه
- الملف والحافظة لطلب رخصة القيادة بـ 35 جنيه
- استمارة بيانات بـ 105 جنيه وطابع شرطة بـ 15 جنيه
- الأحسن يبقى معاك مش أقل من 1500 جنيه عشان تبقى مستعد لأي زيادة محتملة
- خلي معاك 4 صور شخصية (4 × 6) و4 صور لبطاقتك الشخصية عشان هتحتاج 2 منهم على الأقل
خطوات إصدار رخصة القيادة
- سن المتقدم لازم يكون مش أقل من 18 سنة
- لازم تروح إدارة المرور التابعة لعنوانك المكتوب على بطاقتك الشخصية
- خلي معاك البطاقة الشخصية لأن هناك لازم يطلعوا على الأصل
- مع الورق هيتطلب منك صور من المؤهل الدراسي وكمان لازم يكون معاك الأصل منّه لو متخرج
- حسب القوانين فلازم يكون مع طالب الرخصة تحليل مخدرات معتمد عشان يثبت عدم تناوله لأي مواد مخدرة
- اشتري الأوراق المطلوبة بس الأحسن تملا استمارة طلب الرخصة في الأول لأنك بناء عليها هتعمل اختبار القيادة نظري وعملي
- بعد نجاحك في الاختبار هتكمّل باقي الورق (بعده مباشرة إجراءات كشف النظر والباطنة)
- بعد استيفاء الشروط بتقدّم ورقك اللي بيتراجع وبتدخل تتصور وبعدها بتستلم رخصة قيادة صالحة لمدة 10 سنين من تاريخ إصدارها
امتحان القيادة النظري
- اجتيار الامتحان خطوة أساسية للحصول على الرخصة
- بيضم أسئلة عن أساسيات قواعد المرور وبعض الصور والرموز ومعانيها
- بتقدر تشتري الكتاب من أي مدرسة قيادة أو من إدارة المرور التابعة ليك اللي هتعمل فيها الرخصة
- بتختبر الإدارات في أغلب فروعها طالبي الرخصة عن طريق جهاز كومبيوتر بيعرض الأسئلة خلال مدة زمنية محددة
اختبار القيادة العملي
- في كل إدارة مرور فيه مكان مخصص لاختبار المتقدمين الجدد للحصول على رخصة قيادة
- بتتحط الأقماع الأسطوانية متفرقة عن بعضها وبتركب السيارة سواء كانت مانيوال أو أوتوماتيك
- لازم تسوق السيارة بنجاح لتخطي الأقماع سواء بالتقدم للأمام أو بالرجوع للخلف
- الموضوع محتاج تدريب وقدرة على التحكم في السيارة والتركيز على أبعادها والنظر المستمر للمرايات
- حاول تفصل نفسك عن الآخرين وبلاش تستجيب لأي حد بيوتّرك والأحسن تطلع الرخصة بعد التأكد من قدرتك على تخطي الاختبار العملي
تجديد رخصة القيادة
- أغلب الإجراءات بتتكرر مرة تانية مع التجديد بقيمة مشابهة لنفس قيمة إصدار الرخصة لأول مرة
- بتقدم الرخصة القديمة أو بدل تالف منها مع صورة البطاقة الشخصية (ولازم يكون معاك الأصل منها)
- بتطلب منك بعض المستندات زي طلب تجديد الرخصة وأوراق تثبت اللياقة الطبية
- بتقدر تقدم الطلب أونلاين عن طريق الرابط ده
عقوبة القيادة بدون رخصة
- بيواجه أي شخص بيسوق بدون رخصة عقوبة السجن لمدة لا تزيد عن سنة وغرامة بتتراوح قيمتها بين 5000 لـ 20000 جنيه مصري
