نصايح عامة لشراء الأكل من السوبر ماركت

– افصل اللحوم والفراخ والأسماك عن بعضهم في عربة التسوق، والأحسن تفصل بينهم بمنتج مش غذائي (زي علب المناديل مثلًا) أو تغلّف كل حاجة منهم في كيس بلاستيك في مكان منفصل عن التاني، واشتريهم قبل الحساب مباشرة عشان تقلل مدة تواجدهم في درجة حرارة الغرفة

– افصل المنظفات تمامًا عن الأكل خصوصًا الخضروات والفواكه واللحوم

– اتأكد من ملمس الأطعمة المجمدة إنها جامدة مش مفككة أو سايحة ولو بنسبة بسيطة، وراجع برودة الأطعمة اللي بتحتاج تفضل في التلاجة طول الوقت

– لاحظ إن المعلبات مفيهاش أي كسر أو علامة خبطة بسيطة أو صدى، لأن ده معناه فسادها وممكن تحتوي على بكتيريا اسمها (كلوستريديوم بوتولينوم) هي نفسها اللي بتسبب التسمم الغذائي في الفسيخ

– لاحظ ظروف التخزين في السوبر ماركت وبلاش تشتري حاجة التراب متراكم على عبوّتها أو شكلها مش نضيف

تاريخ الصلاحية

 راجع تاريخ الصلاحية على العبوات واختار أقرب تاريخ إنتاج لليوم اللي بتشتري فيها، وفرّق بين الـ Expiry Date وبين Best Before. أحيانًا بتلاقي المصطلحين دول مكتوبين بنفس الشكل وباللغة الإنجليزية، الأول Expiry Date ومعناه تاريخ الانتهاء، يعني بعد التاريخ ده استخدامك للمنتج هيبقى خطر، لكن Best Before معناها إنك تقدر تستخدم المنتج ده بعد التاريخ لكن هتقل استفادتك من المعادن والفيتامينات فيه. 

شراء اللحوم

ركّز إن لون اللحم يبقى أحمر أميل للوردي مش غامق ومفيهوش سوايل كتير أو دم لأن ده معناه فسادها، واضغط عليها بإيدك، لأن ارتفاع النسيج تاني معناه إنها سليمة، وشمّها كويس لأن أي ريحة منفرة أو ملمس لزج دليل على فسادها. 

شراء الدواجن

– لون الدواجن لو وردي معناه إنها طازجة، لكن الرمادي معناه إنها مذبوحة بقالها فترة طويلة، واختارها صلبة لكن مش زيادة عن اللزوم، وممكن تختبرها عن طريق الضغط عليها بإيدك، ارتفاع النسيج تاني معناه إنها سليمة

– شمّها كويس واتأكد من عدم وجود أي ريحة كريهة أو دم وسوايل متراكمة عليها

شراء الأسماك

– اختار سمكة في هيئتها الأصلية ومتجمدة مش محفوظة في درجة حرارة الغرفة، ولازم تبقى معروضة قدامك على تلج حقيقي مش مجرد مياه ساقعة، وريحتها من مياه مالحة أو ريحة سمك مميزة وقوية مش مجرد ريحة تلج فقط.

– اتأكد إن السمكة صلبة ومتماسكة مش ليّنة وطرية وخالية من أي خدوش أو ثقوب وجروح، وركّز إن عين السمكة مفتوحة وصافية، ولون الخياشيم أحمر.

شراء الخضروات والفواكه

– اتأكد إن ملمسها صلب كفاية وراقب جودة كل ثمرة عشان تتأكد خلّوها من الثقوب أو العفن، وبلاش تنجذب للخضروات والفواكه كبيرة الحجم والأحسن تختار الصغيرة أو المتوسطة لأن دراسات كتير بتتكلم عن جودة مياه الري فيها أكتر من الخضروات كبيرة الحجم اللي أحيانًا بيبقى سبب حجمها الكبير هو ريّها بمياه ملوثة، واختار اللون الصريح للثمرة وبلاش تشتري لون مختلف عنّها.