المحتويات
دراسات كتير بتقول إن إدمان الموبايل بيسبب مشاكل في التركيز والذاكرة والقدرات المعرفية، خصوصًا لو بتقعد عليه ساعات طويلة بدون انقطاع، لأنه أحيانًا بيعطلك عن أداء المهام الأساسية في حياتك، خبراء كتير بينصحوا بتقليل مدة التعرض له، منهم (بن باجارين) المحلل في شركة creative strategies اللي قال في تقرير إننا بنمسك الموبايل بمتوسط 80 مرة يوميًا، وبالتالي لازم نحاول بخطوات بسيطة نقلل استهلاكنا له.
أضرار إدمان الموبايل
- دراسات كتير بتقول إن إدمان الموبايل بيزود فرص الإصابة باضطرابات النوم اللي بينعكس تأثيرها على الصحة النفسية والجسدية، وبيزيد بسببها إحساسك بالإرهاق والتعب والقلق، لأن التعرض المستمر لأشعة الموبايل بيقلل هرمون الميلاتونين (هرمون النوم) بالتالي بيزيد إحساسك بالنعاس واضطرابات النوم زي الأرق والنوم المتقطع
- الخبراء بيأكدوا ارتباط إدمان الموبايل بأعراض نفسية زي الاكتئاب والقلق والتوتر وزيادة فرص الإصابة بأمراض زي الوسواس القهري وقلة جودة العلاقات الشخصية سواء علاقات صداقة أو علاقات عاطفية
- بتزيد معاه أعراض إرهاق العين ومنها احمرار العين والحكة والرؤية المشوشة اللي بيتطوروا مع الوقت وبيسببوا أمراض خطيرة للعين وبيأثروا على حالتك المزاجية بسبب الصداع المزمن اللي بينتج عنها
- بتزيد معاه مشاكل عضوية لكل الجسم زي آلام الرقبة بسبب النظر المستمر للموبايل، بجانب الدراسات اللي بتستنتج تأثير إدمان الموبايل على القلب وزيادة فرص الإصابة بأمراض القلب والأوعية الدموية والضغط بسببه، بجانب تأثير الإشعاعات من الموبايل على جودة الحيوانات المنوية عند الرجال
علامات إدمان الموبايل
- احتياجك المستمر لتصفح الموبايل طول الوقت وإحساسك بالاستمتاع اللحظي في بداية اسخدامه
- بيقل إحساسك بالوقت مع استخدامه لساعات طويلة ومش بتزهق منّه
- بتبذل مجهود كبير عشان توصل لشبكة إنترنت سواء واي فاي أو من خلال بيانات الهاتف (Mobile Data) حتى لو مفيش حاجة ضرورية
- بيزيد توترك وعصبيتك بسبب غياب الموبايل عنّك ولو لمدة قصيرة
- بتنام والموبايل جنبك وبتتصفحه لمدة طويلة قبل النوم مباشرة
- بتتصفح الموبايل وقت السواقة وأثناء الأكل
أسباب إدمان الموبايل
- بيزيد تدفق هرمونات بتحسسك بالمتعة والسعادة بسبب تدفق المعلومات اللي بتتعرض له، مع الوقت بتحس بإدمانه والاعتماد عليه كمصدر أساسي للمعرفة
- بتنشط وقتها ناقلات عصبية وبيزيد إفراز مواد كيميائية في المخ قريبة من إدمان المواد المخدرة، لأنك ببساطة بتستخدم الموبايل باستمرار لتعويض إحساسك بالضيق من حالة مزاجية سيئة أو مشكلة في حياتك
- بيتحكم فيه 3 مناطق أساسية في المخ وهي جذع المخ اللي بيتحكم في ضربات القلب والتنفس، والجهاز الحوفي اللي بيعالج الاستجابة المختلفة للمشاعر، والقشرة المخية اللي بتساعد على الفهم والاستيعاب وإتخاذ القرارات
- الـ 3 أجزاء دول بينشطوا بشكل كبير وقت استهلاكك للموبايل لمدة طويلة ومع الوقت بيتحول لإدمان
طريقة تقليل إدمان الموبايل
- راقب الوقت اللي بتستخدم فيه تليفونك وقلله بالتدريج واعرف تطبيقات كتير بتساعدك تعمل ده زي space و moment
- قلل الوقت اللي بتقلب فيه على مواقع التواصل الاجتماعي لأنها أكتر حاجة بتسرق الوقت
- اتدرب تفتح التطبيقات وقت حاجتك ليها.. واستخدم السيرش أكتر من التمرير (الـscrolling)
- بلاش تمسح التطبيقات اللي بتستخدمها كتير عشان هتفضل موجودة في اللا وعي وهترجع تستعملها أكتر
- حدد مدة معينة من يومك ماتمسكش فيها التليفون وزودها مع الوقت
- جرب البدايل اللي تقدر توصل منها لنفس المعلومة من غير استخدام الموبايل زي الآلة الحاسبة عشان تحسب حاجة أو موقع معين عشان تعرف درجة الحرارة
- قول للناس اللي بتتواصل معاهم يوميًا من خلاله عشان يساعدوك ويقللوا رسايلهم ليك
- باستثناء الرسايل الشخصية.. اقفل كل الإشعارات اللي بتجيلك وبتطول مدة استخدامك للتليفون
- دراسات كتير بتقول إن الألوان في التليفون بتتحكم في مشاعرك وبتجذبك تقضي وقت أطول عليه
- خبراء بينصحوا بتغيير شاشة تليفونك للأبيض والأسود وقت استخدامه عشان يقل ارتباطك بيه
- اشغل نفسك بنشاط تاني أو اتعلم حاجة جديدة واختار هدف لنفسك وحاول تحققه في مدة محددة
