أعراض نقص وزيادة النحاس في الجسم ومصادره المختلفة

النحاس من المعادن المهمة في الجسم لأنه موجود في كل الأنسجة وليه دور في تكوين خلايا الدم الحمراء، وبيساعد في الحفاظ على الخلايا العصبية وجهاز المناعة.

أعراض نقص النحاس في الجسم

الشعور بالتعب والضعف العام

• هو ضروري لامتصاص الحديد في الجسم ومع انخفاضه، نسبة الحديد في الجسم بتقل وبالتالي الإصابة بالأنيميا
• الأنيميا بتقلل قدرة الجسم على نقل الأكسجين للأنسجة وده بيسبب الشعور بالتعب على مدار اليوم
• خلايا الجسم بتحتاج النحاس عشان تنتج (Adenosine Triphosphate) مصدر الجسم الأول للطاقة، وبالتالي نقصه بيسبب الإجهاد

الإعياء المتكرر

• الإصابة بنزلات البرد بشكل متكرر ممكن يبقى سببه نقصه في الجسم لأنه ليه دور مهم في تحسين جهاز المناعة
• مع نقصه.. الجسم بيواجه مشكلة في تكوين خلايا الجهاز المناعي، وده بيأثر على تكوين خلايا الدم البيضاء

ضعف العظام 

• هشاشة العظام هي حالة بتسبب ضعف العظام وسهولة تكسره وبيظهر أكتر مع التقدم في العمر وفي حالات الإصابة بنقص النحاس
• هو بيشجع الجسم لإنتاج (Osteoblasts) وهي خلايا بتساعد على تقوية وإعادة تشكيل أنسجة العظام

مشاكل في التعلم والذاكرة

• بما إنه ليه دور في تحسين صحة ونمو العقل والإنزيمات اللي بتمد العقل بالطاقة بتحتاجه، فنقصه مرتبط بمشاكل زي ضعف نمو العقل والقدرة على التعلم والتذكر
• دراسة أثبتت إن حوالي 70% من المصابين بالزهايمر عندهم نسبة أقل من النحاس في جسمهم عن غيرهم

النحاس وصعوبة المشي

• إنزيمات الجسم بتحتاجه للحفاظ على صحة العمود القفري، والإشارات تنتقل بين الجسم والمخ
• نقصه بيأثر على الإنزيمات وبالتالي بيأثر على سهولة وسرعة الإشارات بين المخ والجسم، وده بيسبب المشي غير المنتظم وعدم الثبات

الحساسية للبرد

• نقصه بيسبب الحساسية الزايدة للبرد خاصة مع نقص معادن تانية زي الزنك لأنهم بيأثروا على عمل الغدة الدرقية بشكل سليم
• الدراسات اثبتت إن نسب هرمونات (T3) و(T4) بتنخفض تأثرا بنقصه في الجسم وده بيسبب خمول الغدة الردقية

البشرة الشاحبة

لون البشرة بيتحدد حسب نسبة الميلانين اللي إنزيمات الجسم بتنتجه واللي بتحتاج النحاس في عملية الإنتاج، وبالتالي نقصه بيسبب شحوب لون البشرة

الشعر الأبيض المبكر 

لون الشعر بيتأثر بمادة الميلانين في الجسم، ومع انخفاض مستوى المعدن في الجسم نسبة الميلانين بتقل وبيبدأ ظهور الشعر الأبيض المبكر

 ضعف وفقدان الرؤية

دي حالة بيسببها نقصه الشديد في الجسم لأنه أساسي لعمل إنزيمات الجهاز العصبي بشكل منتظم، وبالتالي نقصه بيسبب مشاكل في الجهاز العصبي منها فقدان الرؤية أو ضعفه

الحالات اللي بتحتاج النحاس في نظامها الغذائي

بعض الحالات الطبية بتحتاجه بشكل أساسي في جسمهم زي:

• الحروق
• الإسهال
• الأمراض المعوية
• أمراض الكلى
• الإجهاد المستمر
• أمراض البنكرياس

أعراض زيادة النحاس في الجسم

بالرغم من أهميته لجسم الإنسان، إلا إن زيادته بتشكل خطورة على الصحة العامة، وزيادته بدرجة معينة بتسبب تسمم النحاس، وبتظهر أعراض زي:

• الغثيان والقيء الممزوج بدم في بعض الحالات
• الإسهال
• ألم المعدة
• تغير لون البراز للغامق
• الصداع
• صعوبة التنفس
• عدم انتظام نبضات القلب
• انخفاض ضغط الدم
• احتمالية الدخول في غيبوبة
• تضرر الكلى والكبد

تسمم النحاس ممكن يسبب أعراض على العقل والسلوك زي:

• الشعور بالإثارة أو الإرهاق
• صعوبة الانتباه
• الاكتئاب والحزن غير العادي
• الشعور بالقلق والانفعال
• تغييرات مفاجئة غير مبررة في المزاج

مصادر النحاس

متوفر في أطعمة كتير زي:

• الكبدة
• الجوز
• المشروم
• الحبوب الكاملة
• البقوليات المجففة
• المحار
• الشوكولاتة الغامقة
• الكاجو الني
• اللوز المحمص
• بذور عباد الشمس
• السمسم المحمص

الجرعة اليومية

من 0-6 شهور

• للذكور: 200 ميكروجرام
• للسيدات: 200 ميكروجرام

من 7-12 شهر

• للذكور: 200 ميكروجرام
• للسيدات: 200 ميكروجرام

من 1-3 سنين

• للذكور: 340 ميكروجرام
• للسيدات: 340 ميكروجرام

من 4-8 سنين

• للذكور: 440 ميكروجرام
• للسيدات: 440 ميكروجرام

من 9-13 سنة

• للذكور: 700 ميكروجرام
• للسيدات: 700 ميكروجرام

من 14-18 سنة

• للذكور: 890 ميكروجرام
• للسيدات: 890 ميكروجرام
• للحوامل: 1000 ميكروجرام

من 19 فيما فوق

• للذكور: 900 ميكروجرام
• للسيدات: 900 ميكروجرام
• للحوامل: 1300 ميكروجرام