البيت
أشكال نجف مودرن وطريقة تنضيفه واختيار الإضاءة المناسبة لكل غرفة
إزاي تعرف أجدد أشكال النجف المودرن؟
![نجف مودرن](https://howtoarabic.com/wp-content/uploads/2021/11/إزاي-تعرف-أجدد-أشكال-النجف-المودرن؟--780x470.png)
المحتويات
نجف مودرن أشكاله مختلفة ومتنوعة هو أغلب اللي موجود دلوقتي في أسواق النجف ومستلزمات الإضاءة عمومًا بس عشان تختار صح لازم تعرف الإضاءة المناسبة لكل غرفة قبل اختيارك لشكل وحدة الإضاءة خصوصًا لو نجف تقيل.
طريقة اختيار الإضاءة حسب كل غرفة
غرفة المعيشة
- هي أكتر مكان حيوي في البيت لأن كل العيلة بتتجمع فيها قدام التليفزيون أو لقراية كتاب
- حجم ومساحة الأوضة مهم جدا في اختيار شكل الوحدات وعددها
- امزج 3 أنواع إضاءة مختلفة: (المحيطة – إضاءة المهام – التوجيهية)
- المحيطة زي السبوتات وبيوت النور والنجف ودي اللي بتنشر النور في الأوضة كلها
- لو المساحة واسعة.. استخدم عدد أكبر من السبوتات أو نجف أكبر أو أكتر من واحدة
- إضاءة المهام زي الأباجورات و اللمباديرات ودي ممكن تنور ركن لشخص واحد
- الأحسن استخدام قطعتين نفس الشكل عشان تحافظ على التناسق
- التوجيهية زي الأباليك والشمعدانات وهي نور هادي بيركز على لوحة أو مرايا
- ممكن تشغل المساحات الفارغة في الحيطة بشكل جذاب
- استخدم “الديمر” عشان تتحكم في شدة النور على حسب احتياجك ونشاطك
السفرة
- اختيار إضاءة مناسبة لكن مش قوية ومزعجة
- مهم تسليط الضوء على الترابيزة لأنها النقطة المحورية
- استخدم نجفة فوق الترابيزة وممكن توزع سبوتات بسيطة في باقي الأوضة لو كانت مساحتها كبيرة
المطبخ
- استخدم أشكال اللمبات المتعلقة لأنها شيك وبتكون إضاءتها كويسة واختار أشكال سهل تنضيفها
- ممكن تستخدم سبوتات عند الدواليب والرخامة واعرف إن الإضاءة البيضاء أنسب لأنها بتوضح الرؤية أكتر
غرفة النوم
- مكان الاسترخاء في البيت عشان كدة إضاءة خفيفة هي الأنسب
- نجفة صغيرة مع سبوتات بسيطة في سقف الاوضة
- بلاش توجه الإضاءة بشكل مباشر عند السرير
- ممكن تزود السبوتات عند الدولاب أو المرايا
- اللون الأصفر بيساعد على الاسترخاء والهدوء وهو الأنسب
- الأحسن إن الإضاءة عند الدولاب تكون بيضا لأنها بتخلي الألوان سواء للهدوم أو البشرة أوضح
الحمام
- نجفة أو وحدة فيها أكتر من لمبة مناسبة عشان رؤية أوضح
- ممكن تستخدم السبوتات أو الأبليك جنب المرايا
- ابعد الأبليك عن المرايا من 50 لـ60 سم عشان تتجنب الضل
- اهتم بعنصر الأمان إنك تبعد مفتاح النور عن مصدر المياه
- اللون الأبيض هو الأنسب لأنه بيدي إحساس بالوسع
أشكال نجف مودرن
طريقة تنضيف النجف
- افصل الكهرباء قبل البدء في التنضيف وافرد ملاية أو قطعة قماش كبيرة تحت النجفة قبل تنضيفها
- هات سلّم عالي عشان تبقى في نفس مستوى النجفة لتنضيفها بدقة وبسرعة وبأقل مجهود
- بلاش تستخدم مواد كيميائية في تنضيفه لأن لونه هيتغير مع الوقت
- بلاش تستخدم ورق جرائد لأنه بيسبب لمعة في البداية لكنه بيحتوي على مواد كيميائية بتضر النجف في المستقبل
- هات قطعة اسفنج أو قماش مبللة ومررها على كل جوانب النجف إلا لو مصنوع من مادة ممكن تصدي لو مررت عليا المياه لمدة طويلة