تكنولوجيا
أسباب انقطاع خدمة فيس بوك وإنستجرام وواتساب لفترة طويلة
إزاي حصل عطل مواقع التواصل الاجتماعي؟
فيس بوك وانستجرام وواتساب أصابهم عطل استمر لمدة أطول من 6 ساعات ونتج عنه خسائر تقدر بـ 20 مليار دولار على أقل تقدير وأسهم فيس بوك تراجعت بنسبة 4.89% في هبوط بيعتبر الأكبر من نوعه في السنوات الأخيرة.
أسباب عطل فيس بوك
- الـ BGP أو (Border Gateway Protocol) هي آلية تبادل المعلومات داخل الإنترنت وببساطة هي قوائم عددها كبير بتتحدث باستمرار وبتوصّل شبكات الإنترنت ببعضها
- من غير الآلية دي هيتوقف نشاط مواقع الإنترنت لأن القوائم دي هي أساس التحديث والنشر وفتح شبكات جديدة داخل المواقع
- الـ BGP بيسمح مثلًا لموقع زي فيس بوك أو أي موقع تاني بالإعلان عن وجوده سواء على أي موقع تاني
- وبالتالي أي عطل في الآلية دي معناها اختفاء الموقع من على قاعدة بيانات الإنترنت وصعوبة الوصول إليه
- كل موقع على الإنترنت له حاجة اسمها ASN أو (Autonomous System Number)
- لإتمام أي عملية في الإنترنت لازم الـ ASN يعرّف الـ BGP بالعملية اللي هيقوم بيها وبمساراتها وبدون عملية التعريف دي محدش هيقدر يتّصل بأي صفحة مخصصة للموقع ده أو يمارس أي نشاط عليه
- الموضوع زي إن شخص يروح مشوار من مكان للتاني وهو حافظ الطريق ولكن فجأة يفقد الذاكرة ويتوه
- أو تبقى عارف الطريق ولكن تلاقي إن العنوان اللي بتروحه دائمًا مش موجود واختفى فجأة
ملاحظة التغييرات قبل العطل
- قبل العطل بـ 5 دقائق لاحظ الخبراء نشاط كبير لإشارات في هيئة أرقام الـ ASN ولكنها مش عارفة توجّه إتجاهها صح وده حصل لأن خوادم الـ DNS كان فيها عطل كبير
- الـ DNS هو اختصار جملة Domaine Name System وهو اللي بيحوّل أسماء المواقع اللي بتكتبها على المتصفح أو بتفتحها على موبايلك لرقم IP يسمحلك بالوصول إلى التطبيق أو الموقع
- الموضوع شبه بالظبط رقم التليفون ولكنك مش مضطر تحفظ الـ IP الخاص بجهازك لأنه بيترجم تلقائيًا بواسطة الـ DNS
- الـ DNS مرتبط بشكل كبير بآلية الـ BGP اللي بتحتوي على قوائم كبيرة بتتحدث باستمرار
- العطل الكبير في عدم القدرة على إعلان مسارات الأرقام اللي بتظهر في هيئة الـ ASN بسبب احتفاظ الآلية اللي بتحتفظ بالأوامر سبب عطل كبير في خوادم الـ DNS اللي عجزت عن توصيل أي شخص بالمواقع المختلفة
استمرار العطل لفترة كبيرة
- خبراء التقنية بيقولوا إن استمرار العطل لفترة كبيرة سببه الأساسي هو دخول أغلب المتصفحين حوالين العالم على التطبيقات المختلفة لتحميلها وبالتالي بتنشغل خوادم الـ DNS بصورة أكبر من المعتاد وده بيأثر على محاولات استعادة الخدمة حتى لو مشكلة أو عطل BGP بيتصلّح بسهولة
- المصادر بتقول إن فريق المهندسين المسؤولين عن صيانة عناوين خدمات فيس بوك عملوا تحديث لعناوين الخدمات وبالتالي اتسحبت بالغلط كل عناوين فيس بوك من على الإنترنت
- ده السبب اللي خلى كل خدمات فيس بوك تتوقف زي الماسنجر وإنستجرام وواتساب لأنها بتستخدم نفس مركز السرفرات وعطلت مش بس عند المستخدمين ولكن عند مسؤولين الشركة نفسهم ومهندسينها لأن المحتوى نفسه أصبح بدون عنوان منشور
- استمرار العطل لمدة طويلة تفسيره من وجهة نظر تانية هو عدم وجود خطة تراجع أو خطة بديلة في حال تم العطل خصوصًا إن مهندسي الشركة فقدوا كل نقاط الإتصال بصفحات موقعهم مرة واحدة وبالتالي الموضوع احتاج وقت ومجهود لاستعادة الصفحات مرة تانية
