وصفات لتنعيم الشعر بمكونات طبيعية ونصائح لغسله بطريقة صحيحة

وصفات لتنعيم الشعر بمكونات طبيعية وموجودة في البيت، من أسهل الطرق للتخلص من الإجهاد والتلف والبهتان اللي بتسببه الصبغات والمواد الكيميائية، واستخدام الحرارة باستمرار والتعرض لأشعة الشمس، وكمان بعض العوامل الصحية زي سوء التغذية. 

وصفات لتنعيم  الشعر الهايش

ماسك العسل والزبادي

• بيساعد في تنعيم الشعر والتخلص من الهيشان، وكمان تغذية البصيلات وتقويتها
• اخلطي معلقتين كبار زبادي مع معلقة كبيرة عسل وافردي الماسك على شعرك من الجذور لحد الأطراف
• سيبيه لمدة 20 دقيقة واغسلي شعرك كويس بالشامبو والمياه الفاترة 
• كرري الماسك مرة أو مرتين في الأسبوع

ماسك جل الصبار 

• بيعزز من لمعانه وزيادة نعومته وكمان بيساهم في تطهير فروة الرأس من البكتيريا والفطريات
• قلبي جل الصبار بالمعلقة لحد ما يبقى قوامه أخف وسلس أكتر 
• على شعرك الرطب.. افردي كمية مناسبة من الجذور للأطراف 
• سيبيه لمدة 30 دقيقة واغسلي شعرك بمياه فاترة 
• كرري الماسك مرة في الأسبوع 

ماسك العسل والأفوكادو

• اخلطي معلقتين كبار عسل مع ثمرة أفوكادو مهروسة، قلبي الخليط كويس لحد ما يبقى ناعم ومن غير أي تكتلات
• افردي الماسك على شعرك من الجذور للأطراف
• سيبه لمدة 40 دقيقة واغسلي شعرك كويس بمياه فاترة وشامبو مناسب  

ماسك الفراولة وزيت جوز الهند والعسل

• بتحتوي الفراولة على فيتامين سي، واللي بيساعد على إنتاج الكولاجين اللازم لإصلاح الشعر التالف، وكمان الفولات الموجودة فيها بيساعد على تعزيز صحة بصيلات الشعر وتقويتها
• اخلطي 6 ثمرات فراولة مهروسة مع معلقة كبيرة زيت جوز الهند ومعلقة كبيرة عسل
• افردي الخليط على شعرك المبلل، وسيبيه لمدة 10 دقايق 
• اغسلي شعرك بالمياه الدافية 

وصفات لتنعيم الشعر قبل النوم

تطبيق الماسكات الطبيعية قبل النوم، بيضمن بقائها لأطول فترة ممكنة للحصول على فوائد أكتر زي:

1. ترطيب الشعر بعمق
2. تنعيم الشعر بفاعلية أكبر
3. إضافة لمعان للشعر وخاصة لو كان الماسك بيحتوي على الموز والأفوكودو وفيتامين E
4. تقليل التشابك في الشعر (خاصة لو غسلتيه بالطريقة الصحيحة)

ماسك زيت جوز الهند مع العسل 

• سخني خليط من 8 معالق زيت جوز الهند مع 6 معالق عسل لحد ما تتجانس مع بعض
• بعد ما يبرد.. افرديه على شعرك من الجذور للأطراف
• غطي شعرك بغطاء من الميكروفيبر 

ماسك حليب جوز الهند مع زيت الأرجان

• اخلطي نص كوباية حليب جوز الهند مع ربع كوباية زيت الأرجان
• افردي الخليط على الشعر من الجذور للأطراف 
• غطي شعرك بغطاء من الميكروفيبر 

ماسك الموز

• اخلطي 2 ثمرة موز مهروسة مع معلقة عسل   
• افردي الخليط على الشعر من الجذور للأطراف 
• غطي شعرك بغطاء من الميكروفيبر 

نصائح لغسل الشعر بطريقة صحيحة بعد الماسك

1. ابدئي بشطف الشعر كويس بالمياه الدافية لحد ما تتخلصي من مكونات الماسك تماما
2. حطي كمية قليلة من الشامبو على إيدك واخلطيه مع كمية مياه مناسبة، وبعد كدة افركي بلطف بأطراف أصابعك بشكل دائري
3. بعد شطف الشعر كويس جدا من الشامبو.. وزعي كمية مناسبة من البلسم المخلوط بقليل من المياه على شعرك ماعدا فروة الرأس، وسيبيه لمدة دقيقتين لـ3، واشطفيه كويس بالمياه الفاترة أو الدافية
4. تجنبي تجميع شعرك فوق رأسك لأنه هيسبب تعقيده وصعوبة تمشيطه بشكل يزيد تقصفه وتكسره
5. نشفيه بطريقة التربيت بلطف وتجنبي فركه بالفوطة
6. استخدمي المشط الخشبي متباعد الأسنان، وسرحيه من تحت لفوق