المحتويات
الغسالة الأوتوماتيك من ضروريات الحياة اليومية اللي بتسهل عملية غسل وعصر وأحيانًا تجفيف الملابس بجانب إنها الاختيار الأمثل للحفاظ على الملابس نظيفة والعناية بيها وتقليل فرص تلفها أو قطعها والتخلص من أي أوساخ أو بقع عميقة عليها.
نصائح قبل اختيار الغسالة المناسبة
- اسأل الأشخاص المحيطين بيك قبل الشراء أو اقرأ تقييمات العملاء على مواقع التواصل الخاصة بالعلامة التجارية اللي هتشتري منها
- ضروري تحدد مكانها بدقة ومقاسات المكان عشان تختار غسالة حجمها مناسب لبيتك
- خليك حريص في اختيار سعة غسالة مناسبة لاحتياجات أسرتك وعمومًا سعتها بتتراوح بين 5 كجم لـ 12 كجم وبالتالي ضروري تعرف معدل استهلاكك خلال الغسل
- الكليلو تقريبًا = 5 تيشيرتات (أو قمصان) قطن أو فوطتين كبار أو بنطلونين جينز وتيشيرت أو قميص قطن
- اعرف إن معدل الدوران في الدقيقة عامل أساسي في اختيارها لأن الدورات لعدد مرات أكتر خلال الدقيقة معناه إن فرص الملابس في الجفاف أكتر من مرات الدوران القليلة
- راعي إنها تبقى بتحتوب على تقنية Auto-Dispense أو Smart Dispense Technology وهي تقنية بتسهّل توزيع المسحوق داخلها أثناء دورة الغسيل
- بعض الغسالات المتطورة بتخصص تطبيق على الموبايل تقدر من خلاله تتحكم في غسالتك وتعرف لو انتهت من دورة الغسيل ولا لأ
كيفية الحفاظ عليها لأطول وقت
- خليها على قاعدة مستوية ومرتفعة عن الأرض.. اهتزازها المستمر هيزود فرص تلف جسمها
- استخدم مسحوق غسيل أو منظف عالي الجودة بكمية مناسبة حسب الإرشادات الموجودة عليها
- قسّم الغسيل على دورات مختلفة وبلاش تكدس كمية كبيرة في وقت واحد
- حافظ على نضافة فلتر الغسالة لأن تراكم الشوائب فيه مع الوقت بيقلل جودة التنضيف وبيزود فرص تلفها لكن مهم تغسل كمية مناسبة في كل مرة وبلاش تشغّلها على قطعة واحدة إلا للضرورة
- نضّفها باستمرار خصوصًا درج المسحوق والحوض والباب الداخلي واتأكد من عدم وجود أي شيء في الجيوب أو بين الملابس ممكن يأثر عليها
- بلاش تغسل أي ملابس فيها أدوات أو إكسسوارات حادة ممكن تجرح حوض الغسالة أو بابها
- سيب بابها مفتوح بعد كل غسلة لمدة بسيطة لمنع تكون العفن والفطريات
- وازن بين استخدامك للمياه الباردة أو الساخنة وراجع على الخراطيم خلفها واتأكد من جودتها وسلامتها كل فترة
حل مشكلة صوت الغسالة العالي
- اتأكد إن براغي الشحن مفكوكة خصوصًا لو لسه جديدة وبتعمل صوت عالي لأن برغي واحد ممكن يبقى سبب الصوت
- خلي أرجل الغسالة كلها بنفس الطول واتأكد من سلامتها وعدم تآكلها
- اتأكد إنها على سطح مستوي والتزم بالحمولة المقررة المناسبة لسعتها وبلاش تكدّسها بالملابس
- أحيانًا بيبقى السبب وضع الغسيل بشكل عشوائي أو تشغيل دورة غسيل على عدد قطع قليل
- خليك حريص على توزيع الملابس بتوازن داخلها
- بلاش تحطها ملتصقة في الحائط أو في مكان محدود وخلي فيه مسافة ولو بسيطة حواليها
- افحص الملابس قبل غسلها واتأكد إن مفيش جسم صلب أو معدني داخلها ونضّف كاوتشة الباب عشان تمنع انحشار أي شيء فيها
- اتأكد إن جسمها المعدني مظبوط لأن أي انعواج ولو بسيط في الجسم الخارجي بيقلل توازنها
- لو مش عارف تحدد سبب المشكلة استشير فني متخصص فورًا
- أهم مسببات الصوت العالي تلف رومان بلي المحرك أو مشكلة في سوست التعليق أو مشكلة في رومان بلي الحلة وكلها مشاكل سهل حلها
بعض أسباب توقف الغسالة المفاجيء عن عملها
- مشكلة في محبس تزويد المياه لأن أحيانًا المحبس بيعطل وبالتالي ضروري تتأكد إن المحبس مفتوح بنسبة 100%
- انسداد خرطوم تصريف الغسالة بسبب تراكم الأوساخ والشوائب عشان كده مهم تهتم بمواعيد الصيانة أو تفصل الكهرباء عنها وتتحقق إذا كان مترّكب صح ولا لأ
- بعض مشاكل الغسالة مرتبطة بعطل في عنصر تسخين المياه أو عطل في التيرموستات بيسبب ارتفاع شديد في حرارة المياه
- أعطال التايمر اللي بتحدد منّه طبيعة دورة الغسيل أو مشاكل البورد الإلكتروني بتوقّف الغسالة عن العمل وقتها لازم تستشير متخصص عشان يفحص الغسالة ويصلح العطل في أسرع وقت
حل مشكلة عدم سحب الغسالة للمسحوق
- المشكلة في أغلب الأحيان بيبقى سببها انسداد مصفاة الخرطوم اللي بيدخّل المياه ليها وبالتالي ضروري تفصلها عن الكهرباء نهائيًا
- لف الغسالة وخلي ضهرها قدامك وفك الصامولة اللي بتثبّت الخرطوم فيها
- اسحب المصفاة الموجودة داخل الخرطوم ونضّفها كويس.. غالبًا هتبقى مليانة بالرمال أو الأجسام الصغيرة
- رجّع المصفاة مكانها مرة تانية وركّب الصامولة صح لأن تلفها أحيانًا ممكن يضطرك تغيّر الخرطوم كله
- اتأكد إن حنفية المياه شغالة لأن ضعف ضخ المياه معناه عدم القدرة على سحب المسحوق أو المعطر
- لو المياه ضخها قوي والخرطوم سليم وخالي من الشوائب ضروري تستشير فني متخصص يساعدك تحل المشكلة
