المحتويات
مكمل غذائي هو دواء في أشكال مختلفة سواء أقراص أو شراب، بيحتوي على فيتامين أو معدن زي فيتامين سي أو الزنك أو الأوميجا 3، أو مجموعة عناصر غذائية (فيتامينات ومعادن وألياف وأحماض أمينية)، بيتم تناولها لتعويض نقصها في النظام الغذائي لأي شخص أو استهلاكها بكمية غير كافية، لكن قبل استخدامه مهم تكون عارف العلامات الصحية وأهم مؤشرات الحاجة لتناوله
كيفية اختيار مكمل غذائي مناسب
- مهم تكون عارف الهدف من تناوله هل لعلاج نقص لعنصر غذائي محدد أو تحسين من عرض ما
- اقرأ النشرة الطبية كويس لأنها هتعرفك المكون أو المكونات الفعالة أو كمية العناصر الغذائية في كل حصة وهل ممنوعة لأصحاب بعض الأمراض أو لها آثار جانبية
- كمان معرفة محتوى المكونات النشطة في كل نوع بيحدد نوعية وكفاءة المنتج، لو الكمية قليلة بينصح بتناول قرصين منها يوميًا عكس اللي محتواها عالي بيكون كافي قرص واحد
- مهم تكون عارف بتاكل إيه لأن الفيتامينات والمعادن موجودة في عدد كبير من الأطعمة، ولو بتتناولها كمان في المكملات الغذائي، ممكن تحصل على كمية أزيد من اللي محتاجه وتصاب بأعراض جانبية أو يحصل ضرر في جسمك
- من الأفضل عدم تناول مكمل غذائي بدون إشراف طبي، وتكون عملت تحليل وفحوصات عشان يقدر الدكتور يحدد احتياجك اليومي
إمتى تحتاج مكمل غذائي؟
- لو كنت حامل أو في محاولة للحمل
- لو بتعاني من ضعف شهية أو صعوبة في الحصول على الأطعمة المغذية
- مرضى الحساسية أو بتتبع نظام غذائي بيستبعد مجموعات غذائية كاملة، أو بتعاني من حالة مرضية بتأثر على طريقة الهضم زي الإسهال المزمن أو مرض في الكبد أو المرارة أو الأمعاء أو البنكرياس
- لو خضعت لعملية جراحية في الجهاز الهضمي تؤثر على كيفية هضم جسمك للعناصر الغذائية
أعراض وعلامات إنك محتاج مكمل غذائي
- ضعف الشعر والأظافر: لو بتعاني من تقصف أو تساقط أو بهتان الشعر أو سهولة تكسر الأظافر كلها علامات مرتبطة بنقص فيتامين البيوتين
- الإحساس بالتعب والإرهاق المستمر: بيكون سببه نقص الكالسيوم لكن مهم تستشير دكتور لأن زيادة الكالسيوم في الجسم بتأدي لأثار جانبية
- احمرار العين: هي دلالة على نقص في فيتامين ب2 أو ما يعرف بالريبوفلافين
- الكدمات ونزيف اللثة: هي علامة على نقص فيتامين سي
- تشنجات الساق: دليل على نقص فيتامين هـ.. واحد من الفيتامينات الأساسية للي مش بينتجها الجسم
أنواع المكملات الغذائية
- الفيتامينات المتعددة: عادة بيلجأ لها الرجال أكتر من النساء، وبيفضل اختيار النوع اللي بيحتوي على جميع الفيتامينات من عائلة ب
- المعادن لكن تناولها مهم يكون بوصفة طبية، وذلك لأن زيادتها في الجسم بتأدي لعدد كبير من المشاكل الصحية وبعضها خطير
- النباتات الطبية من أهم أنواع المكملات لأنها غنية بمضادات الأكسدة، اللي بتحمي الجسم من الإجهاد التأكسدي
نصائح قبل تناول أي مكمل غذائي
- اقرا تاريخ الصلاحية، وبينصح باختيار مكمل له صلاحية لفترة طويلة بأكبر قدر ممكن
- وتجنب شراء المكملات اللي بتنتهي صلاحيتها قبل الانتهاء من استهلاكها
- تجنب اختيار المكمل المدون عليه كلمة ميجا لأنها معناها إنه بكفاءة عالية واللي ممكن يكون له أثار جانبية، وضروري يكون استخدامه تحت إشراف دكتور
- اشتري الماركات والشركات القديمة والمختصة في مجال النباتات والمكملات الغذائية، لأنها موثوق فيها ومنتجاتها هتكون بجودة عالية
هل المكملات الغذائية تضر الجسم؟
- تناول أي نوع بدون حاجة الجسم بتضر، خاصة العناصر الغذائية اللي مش بيتم إفرازها في البول وبتتراكم في الجسم
- ممكن تأدي زيادة بعض العناصر لأضرار في أعضاء الجسم زي تراكم الكالسيوم على العضم
