تأثير الكحك على الصحة وزيادة الوزن
– بتختلف السعرات الحرارية في الكحك حسب وزنه والحشو الداخلي سواء سادة أو ملبن أو تمر أو بالمكسرات. الخبراء بيرجحوا إن كل جرام كحك بيحتوي على 4 سعرات حرارية وبالتالي الكحكة متوسطة الحجم بتحتوي على 120 سعر حراري لكن ممكن يزيد لو محشية تمر أو مكسرات أو ملبن.
– بيحتاج الجسم 7500 سعر حراري تقريبًا عشان يزيد كيلوجرام واحد، وبالتالي لو أكلت متوسط 5 كحكات في اليوم يعني حوالي 5 × 3 = 15 كحكة في العيد يعني حوالي 1800 سعر حراري دخلوا جسمك، وده معناه إنك هتزيد ربع كيلو في 3 أيام بسبب الكحك بس بدون أي أكل أو مشروبات تانية فيها سعرات هتزود وزنك.
– اعرف إن 3 كحكات في طبق واحد فيهم سعرات وجبة غداء كاملة مشبعة فيها رغيفين عيش، وصعب استبدال الوجبة الرئيسية بالكحك لأنه بيعلّي السكر زيادة عن الطبيعي مرة واحدة وبعدها بينخفض بسرعة مشابهة فبتحس بالضعف والتعب وبيزيد احتياج جسمك للأكل بشراهة وده بيفسر سبب زيادة الوزن المفاجئة بعد تناول الكحك ولو بكمية محدودة.
– بتزود فرص تعرّضك لأمراض السكر والقلب والأوعية الدموية حسب دراسات كتير، واستهلاك كميات كبيرة منّه على المدى الطويل بيزود خطر الوفاة بنسبة 25%، والخبراء بيأكدوا إنه بيقلل الكولاجين في الجلد وبالتالي بيزوّد فرص ظهور التجاعيد.
الطريقة السليمة لتناول الكحك
– بلاش تاكل أكتر من قطعتين حجمهم متوسط على مدار اليوم وعلى فترات متقطعة مش مرّة واحدة، واختار الكحك المحشي بالمكسرات الخالي من السكر المرشوش لأن سعراته أقل نسبيًا واختار ساعات النهار لأن الحرق فيها أكتر
– اختار مشروب سخن يحسسك بالشبع ويزوّد الحرق عندك زي الشاي الأخضر أو الجنزبيل
– العب رياضة الصبح وتناول 3 بلحات على الإفطار عشان يمدّوك بالطاقة وبعدها امشي لمدة 30 دقيقة على الأقل، واتمرن صح عشان تحقق أكبر استفادة واستفيد من تمارين الكارديو زي الجري أو العجلة أو السباحة أو حمل الأوزان عشان تحرق أكبر قدر ممكن من السعرات الحرارية في جسمك وتزوّد الحرق وبالتالي تقلل تأثير الكحك عليك
– جهّز طبق سلطة كبير غني بالخضروات خصوصًا الجزر والخيار والخس، وكل نصه قبل الكحك والنص التاني بعدها، هتحس بالامتلاء فهتقلل أكلك للكحك أو البسكوت وبعد تناول الكحك هتقل شهيتك بسبب اضطراب مستويات السكر في جسمك فهتقلل تأثيره عليك
– اشرب كوبايتين مياه قبل تناول الكحك عشان تزود امتلاء معدتك، وبلاش تستسلم للكسل بعدها وابذل أي مجهود بدني حتى لو في بيتك
تجنب الحموضة من الكحك
– الأطعمة الدسمة بعد رمضان مباشرة بتأثر على القولون وبالتالي بتزود العبء عليه بسبب السمن البلدي اللي بيعتبر مكوّن أساسي في الكحك
– اشرب مياه كتير طول اليوم، واهتم بمشروبات زي الشاي الأخضر أو الجنزبيل أو القرفة وعصير الرمّان واشرب لبن رايب (ممكن تستبدله بتناول كوباية زبادي منزوع الدسم)
– تجنب المشروبات الغازية وقلل الكافيين الموجود في الشاي والقهوة قدر المستطاع، لأنها بتنشط المعدة وبتزوّد إفراز العصارة الهضمية
– ابعد عن الأكلات الدسمة والمقلية، والأحسن تاكل سمك مشوي مع سلطة الخضروات لأنه قليل السعرات وغني بالفوايد وأقل في السعرات الحرارية وبيحسسك بالامتلاء
– بلاش تاكل كحك أول ساعة بعد الاستيقاظ أو آخر ساعة قبل النوم
