المحتويات
فوائد التبرع بالدم مش مقتصرة على إنقاذ مريض من الموت وعمل الخير، لكن بتشمل كمان صحة المريض نفسه أهمها تجدد الدورة الدموية في الجسم وحمايته من أمراض القلب، لكن قبل ما تاخد قرار التبرع لازم تكون عارف شروط التبرع نفسها، والفصايل المتماشية مع فصيلتك.
فوائد التبرع بالدم
- دراسات قالت إن معدل الإصابة بالنوبات القلبية والنزيف الدماغي أقل للأشخاص المتبرعين بالدم بشكل منتظم، لأن نسبة الحديد السام في كريات الدم الحمراء بتقل ومعها بتنخفض نسبة أكسدة الأكسجين وخطر الإصابة بهذه الأمراض
- كمان بيقلل نسبة الإصابة بسرطان الكبد والمريء والمعدة والقولون والرئة، بسبب تجدد الدم والحفاظ على نسبة الحديد بمعدلاته الطبيعية بدون أي زيادة تسبب تضرر الأنسجة
- تقليل عوامل الأكسدة ومحفزات الالتهاب في الجسم
- منع تلف الكبد الناتج عن زيادة الحديد في الجسم
- تقليل خطر الإصابة بداء ترسب الأصبغة الدموية، وده اضطراب وراثي بيمتص فيه الجسم نسبة كبيرة من الحديد في الأكل
شروط التبرع بالدم
- تكون من 18 لـ65 سنة
- وزنك ميقلش عن 50 كجم
- ما تبرعتش بالدم قبل 3 أو 4 شهور
- بصحة جيدة ومش بتعاني من مرض مزمن زي السكر والضغط أو عندك برد أو التهاب الحلق أو هربس الحمى
- مش عامل تاتو قبلها على الأقل بـ6 شهور
- مش عامل عملية جراحية قبل شهر عل الأقل
- آخر زيارة لدكتور الأسنان قبلها بـ24 ساعة على الأقل من غير أي جراحة أو خلع
- مستوى الهيموجلوبين (12 جرام للإناث و13 جرام للذكور)
نصائح قبل وبعد التبرع بالدم
- مهم تاكل وجبة خفيفة صحية قبلها بساعتين فيها حديد زي الخضار الورقي
- تجنب الدهون زي (البطاطس المقلية والوجبات السريعة والحلويات الدسمة) لأنها بتأثر على اختبارات العدوى اللي بتتعمل قبل التبرع
- اشرب كوبايتين مياه أو سوايل قبل التبرع و4 كوبايات بعدها
- خد قسط كافي من النوم على الأقل 8 ساعات
- تجنب تناول مسكن أسبرين قبل التبرع بيومين
- اتأكد إن الإبرة جديدة ومعقمة
- بعد التبرع.. تجنب أي مجهود بدني عنيف لمدة 5 ساعات
- لو حصل أي نزيف بعد ما تشيل الضمادة اضغط عليها وارفع دراعك
- لو حسيت بدوخة.. استرخي وارفع رجلك لفوق لحد ما الدم يوصل للمخ
فئات ممنوعة من التبرع
- لو بتعاني من أي أمراض قلبية مزمنة أو ضغط الدم غير المنتظم
- سبق الإصابة بالفيروسات الكبدية (بي – سي) أو الإيدز
- مرضى السكري من النوع التاني وبيستخدموا حقن الأنسولين
- الخضوع لعملية جراحية كبيرة وتم نقل دم له قبل مرور سنة
- إجراء خلع أو أي عملية جراحية بالأسنان قبل 6 شهور
- الحوامل
فصائل الدم المتوافقة
كل شخص بيتميز بفصيلة معينة من الدم، وفي أغلب الوقت بتكون موروثة من أحد الوالدين، لكن ماينفعش أي شخص يتبرع لحد بالدم إلا لما يكون متوافق معاه، لأن عدم التطابق بين المتبرع والمتلقي ممكن يسبب الموت السريع
- فصيلة دم A+ يتبرع لـA+, AB+ ويستقبل من A+, A-, O+, O-
- أما A- يتبرع لـ A-, A+, AB-, AB+ ويستقبل من A-, O-
- وصاحب فصيلة B+ يتبرع لـB+, AB+ ويستقبل من B+, B-, O+, O-
- وفصيلة B- يتبرع لـB-, B+, AB-, AB+ ويستقبل من B-, O-
- صاحب فصيلة AB+ يتبرع لنفسه بس ويستقبل من كل الفصائل
- أما فصيلة AB- يتبرع لـAB-, AB+ ويستقبل من AB-, A-, B-, O-
- صاحب فصيلة O+ يتبرع لـO+, A+, B+, AB+ ويستقبل من -O+, O
- وفصيلة O- يتبرع لكل فصائل الدم ويستقبل من نفسه بس
