عين السمكة واسمها العلمي الثالول الأخمصي بتعتبر من الزوائد الجلدية اللي بتظهر في أغلب الأحيان على القدم وممكن تتطور للإيد أو للجلد عمومًا ولكن تمركزها الرئيسي في القدم، أحيانًا بتختفي من نفسها ولكن ممكن مع الوقت تحتاج رعاية خاصة أو تسبب تدخل جراحي سطحي لإزالتها.
تعريف عين السمكة
- الثالول الأخمصي هو عبارة عن زوايد جلدية صغيرة بتظهر على كعب القدم أو على مناطق حمل الأوزان وبتتراكم بشكل كبير تحت طبقة سميكة من الجلد
- مش بتعتبر مشكلة صحية خطيرة لكن انتشارها في أكتر من مكان في نفس القدم أو القدمين مع أي إحساس غير مريح فيها بيحتاج تدخل طبي سطحي لإزالتها
- أحيانًا بتسب ألم وبينتج عنه تغير في حركة المشي والوقوف ومع الوقت ممكن يسبب ألم في المفاصل
أعراض عين السمكة
- ظهور زاويد صغيرة ملمسها خشن وفي شكل حبيبات صغيرة وفي أغلب الوقت بتتركز في باطن القدم وسط قاعدة الأصابع
- بيزيد سمك الجلد عند بقعة معيّنة وبتظهر بقع سوداء في شكل بذور ولكنها أوعية دموية متجلطة
- بتتقاطع الزوايد الصغيرة مع الخطوط الطبيعية في القدم
الأسباب
- الإصابة بفيروس ورم الحليمي البشري في طبقة الجلد الخارجية وتحديدًا في باطن القدم
- الفيروس بيدخل من خلال الجروح الصغيرة أو نقاط الضعف في بطن الرجل
- بيسبب ظهور الزوايد اللي بتختلف شدتها ومدى انتشارها حسب قوة الفيروس
- بعض الأنواع من الفيروس ده بتسبب ظهور نفس الأعراض في جلد الجسم كله مش القدمين فقط
العلاج
- معظمها مش مضرة وبتختفي لوحدها بدون علاج ولكن ممكن تستمر لمدة طويلة بتوصل أحيانًا لسنة أو اتنين
- لو بتزوّد إحساسك بعدم الراحة لازم تشيلها عن طريق أدوية تقشير بتحتوي على حمض الساليسيليك
- بتستخدم أدوية التقشير بجرعات مناسبة وتحت إشراف طبيب متخصص وبتنشط فاعلية جهاز المناعة ضد الفيروس
- بعض الأطباء بيستخدموا تقنية التبريد عن طريق وضع النيتروجين سواء بالرش أو عن طريق مسح مكان عين السمكة بالقطن
- بعض الطرق الطبيعية ممكن تسهّل العلاج زي:
- زيوت (جوز الهند أو الزعتر أو الليمون أو شجرة الشاي)
- الكركم
- التوم
- وبتستخدم عن طريق وضعها مباشرة على منطقة عين السمكة وتركها عليها لمدة 10 دقايق مرة كل أسبوع
جراحات علاج عين السمكة
- اغلب الأطباء مش بيستخدموا جراحة إلا بعد فشل العلاجات الدوائية
- بيستخدم الطبيب إبرة كهربائية لقص عين السمكة بعد تخدير القدم وبتتسمى بعملية التجفيف الكهربائي وأحيانًا بتسبب ألم وبتظهر ندوبات مكان الجراحة
- طريقة تانية بيستخدم فيها الطبيب أشعة الليزر في كويها عشان يقتل الأنسجة المصابة لكن الطريقة دي بتزوّد فرص ظهور ندوب مكان عين السمكة وبتحتاج علاج مستمر ومكثف بعدها بيستمر 4 أسابيع
الوقاية
- بلاش تمشي حافي خصوصًا على حمام السباحة والتزم بلبس الشبشب
- حافظ على نظافة القدمين عن طريق غسلهم باستمرار وجففهم بعد غسيلهم
- بلاش تلبس شراب أكتر من مرة واهتم بنضافة الشرابات
- استخدام نفس مقص الأظافر أو المبرد أو الأدوات الشخصية اللي بتحتك بالقدم بتزوّد فرص الإصابة
- بلاش تلمس عين السمكة بإيدك ولو لمستها أغسل إيدك فورًا بعدها لأنها ممكن تبقى معدية
- غطيها بشريط لاصق طول الوقت وافتكر إن احتكاك القدمين لمدة طويلة ممكن يؤدي لانتقال العدوى للقدم التانية
