المحتويات
زبدة اللوز من أفيد أنواع زبدة المكسرات لأنها غنية بالدهون الصحية والفيتامينات ومضادات الأكسدة، وسهل تعملها في البيت بخطوات بسيطة.
طريقة عمل زبدة اللوز في البيت
افرد 3 كوبايات لوز ني على ورق زبدة في صينية.. الكمية دي هتعمل حوالي كوباية ونص زبدة
حمصهم في الفرن على درجة 180 لمدة 10 دقايق وقلبهم في نص الوقت
افرمهم في الكبة أكتر من مرة لحد ما يتحول للقوام اللي عايزاه
زود رشة بسيطة ملح ونص معلقة صغيرة عسل
حط الخليط في برطمان وبعد ما يهدى احفظه في التلاجة
فوائد زبدة اللوز
بما إنها مصنوعة من اللوز المطحون الخالص، فهي بتحتوي على كل عناصر اللوز الغذائية
بالرغم من إنها غنية بالسعرات الحرارية، إلا إنها مصدر غني بالفيتامينات والمعادن ومضادات الأكسدة
مصدر للدهون الصحية
- زبدة اللوز غنية بالدهون الصحية اللي بتساعد على تقليل الكوليسترول الضار في الجسم وبتزود الكوليسترول الجيد
- غنية بعناصر غذائية بتساعد على تحسين صحة القلب وتقليل خطر إصابته بأمراض مختلفة
- فيها نسبة من أحماض أوميجا 3 اللي بتساعد على الوقاية من اضطراب ضربات القلب
- زبدة اللوز فيها كمية من فيتامين هـ اللي بيقلل خطر تراكم البلاك في الأوعية الدموية
- فيها مادة إل-أرجينين اللي بتحسن حالة جدران الأوعية الدموية
زبدة اللوز والعظام
- فيها حوالي 5% من احتياجك اليومي من الكالسيوم، وهو أهم عنصر لصحة العظام وحمايتها من التكسر والأمراض
- المغنيسيوم اللي فيها بيساعد الجسم على امتصاص الكالسيوم بنسبة أعلى
التحكم في مستوى السكر في الدم
- اللوز بيساعد على التحكم فيه والسيطرة على مستوى الأنسولين بعد الأكل
- المغنيسيوم فيها بيحسن حساسية الأنسولين في الجسم وده بيقلل خطر الإصابة بداء السكري
فوائد تانية لزبدة اللوز
- فيها فيتامين هـ أكتر من أي نوع مكسرات تاني، وهو مضاد للأكسدة بمعنى إنه بيحمي الجسم من الأمراض الخطيرة زي أمراض القلب والالتهابات والسمنة
- فيها مركبات مهمة زي الفلافونويد والبوليفينول اللي بيساعدوا في حماية الجسم ووقايته من التأكسد
صحة العقل
- بما إنها غنية بالألياف وحمض الفوليك وفيتامين هـ، فهي بتساعد على تأخر الانحدار العقلي وتأثر الخلايا بالتقدم في العمر
- وده بيساعد على الوقاية من انحدار الذاكرة وضعف التركيز
التحكم في الشهية
- نتيجة لكمية الألياف اللي فيها، فهي بتساعد على سد الشهية والشعور بالشبع لفترة طويلة
- أكلها مع عنصر تاني صحي زي الفواكه أو الكراكرز بيبطأ الهضم وبيسد الشهية والميل لوجبات خفيفة في نص اليوم
اللوز وصحة المعدة
الدراسات أثبتت إنها بتمد المعدة ببكتيريا نافعة (البريبيوتك) وبالتالي الحفاظ على صحة الجهاز الهضمي
