المحتويات
اللازانيا من المطبخ الإيطالي وهي واحدة من أقدم أنواع المكرونة، بتتكون من طبقات المكرونة العريضة والمسطحة مع اللحمة المفرومة والبشاميل، ممكن تتعمل بحشوات مختلفة زي الفراخ والسبانخ، بنقدم لك طريقة عمل اللازانيا بطرق مختلفة وخطوات سهلة وبسيطة.
طريقة عمل اللازانيا
المكونات
- علبة شرايح لازانيا
- نص كيلو لحمة مفرومة
- معلقتين كبار زيت
- معلقة كبيرة زبدة
- بصلة مفرومة
- معلقة صغيرة بابريكا
- ربع كوباية كرفس مفروم
- فص توم مفروم
- معلقة صغيرة جنزبيل
- 3 كوبايات صلصة بوريه (أو عصير طماطم مركز)
- معلقة صغيرة بودرة توم
- ملح وفلفل أسود
- معلقة صغيرة بودرة بصل
- كوباية ونص جبنة موتزاريلا
- 3 كوبايات بشاميل
الطريقة
- شوح البصلة في الزبدة مع معلقة كبيرة زيت وضيف الكرفس
- ضيف الجزر والتوم وقلب كويس
- تبل بالفلفل الأسود وضيف اللحمة المفرومة
- قلب الخليط مع بعض وضيف الجنزبيل والبابريكا وبودرة التوم والبصل والملح
- ضيف كوبايتين الصلصة وسيب خليط اللحمة يتسبك على نار هادية
- في طاجن.. ضيف معلقة كبيرة زيت مع كوباية صلصة
- وافرد شرايح لازانيا تغطي الصلصة والزيت
- ضيف طبقة من خليط اللحمة المفرومة وعليها طبقة جبنة متوزاريلا
- كرر أخر خطوتين مع باقي كمية اللازانيا واللحمة المفرومة
- ضيف البشاميل وباقي الجبنة الموتزاريلا على سطحها
- دخل اللازانيا الفرن لمدة 30 دقيقة
طريقة عمل اللازانيا بالفراخ
المكونات
- 12 شريحة لازانيا
- 2 صدر فرخة مقطع شرايح
- 3 معالق كبار زيت زيتون
- بصلة مفرومة
- ملح وفلفل أسود
- نص معلقة صغيرة روزماري مطحون
- نص معلقة صغيرة ريحان
البشاميل
- 5 كوبايات لبن حليب
- 6 معالق كبار زبدة
- ملح وفلفل أسود
- كوباية جبنة موتزاريلا
الطريقة
- انقع اللازانيا في مياه سخنة لمدة نص ساعة
- سخن الزيت وشوح البصل لحد ما يدبل
- ضيف الفراخ وقلب لحد ما لونها يتغير وتبل بالملح والفلفل الأسود والروزماري والريحان
- سيح الزبدة وضيف الدقيق وقلب لحد ما يبقى لونه دهبي فاتح
- ضيف اللبن بالتدريج مع التقليب المستمر عشان مايكلكعش وتبل بالملح والفلفل الأسود
- في صينية أو بايريكس.. ضيف كمية بشاميل في القعر
- افرد طبقة من اللازانيا
- وزع عليها نص كمية حشوة الفراخ وكمية بشاميل والجبنة الموتزاريلا
- كرر آخر خطوتين مع باقي كمية اللازانيا والحشوة
- وزع باقي كمية البشاميل وعليها الجبنة ودخل الصينية الفرن لمدة 35 دقيقة
طريقة عمل اللازانيا بالسبانخ
المكونات
- 3 كوبايات بشاميل
- علبة لازانيا (500 جرام)
- كيلو سبانخ
- كوبايتين جبنة كريمي
- نص كوباية أوراق ريحان مفرومة
- بصلتين كبار مقطعين شرايح رفعية
- 3 معالق كبار زيت
الطريقة
- سخن الزيت وشوح البصل وقلبه لحد ما يبقى لونه دهبي
- افرم السبانخ مع الجبنة الكريمي والملح
- والفلفل الأسود
- ادهن صينية بايريكس بالزبدة ووزع عليها نص كوباية بشاميل (في قاع الصينية)
- حط طبقة من اللازانيا وعليها كمية من السبانخ والبصل
- رص طبقة تانية من اللازانيا وكمية السبانخ والبصل الباقية ونص وكوباية بشاميل
- حط الطبقة الأخيرة من اللازانيا وباقي كمية البشاميل
- ممكن توزع كمية من الجبنة الموتزاريلا على سطح الصينية
- دخل الصينية الفرن لمدة 30 – 40 دقيقة
