اللبن من المشروبات المستخدمة يوميا، وليه أنواع مختلفة مناسبة للحالات الصحية زي حساسية اللبن وتقدر تعملهم في البيت بسهولة.
أنواع اللبن ليها فوائد صحية وقيم غذائية بتختلف حسب نوعه وطريقة عمله زي لبن اللوز وجوز الهند والشوفان، فمهم تعمله في البيت للتحكم في الإضافات وكمياتها.
طريقة عمل لبن جوز الهند
- اخلط كوب من جوز هند المبشور مع كوبايتين مياه مغلية
- ممكن تضيف حبة بلح أو نص معلقة صغيرة فانيليا أو معلقتين صغيرين كاكاو للتحلية ولكن ده اختياري
- استمر في الخلط 5 دقايق أو أكتر
- صفيه كويس جدا في قماشة تصفية الجبنة أو مصفاة عادية
- احفظه في زجاجة غطاها محكم.. بيقعد في التلاجة لحد 5 أيام بس لازم ترجه كويس قبل الاستخدام
- جوز الهند الباقي ممكن تستخدمه في وصفات الحلويات أو العصاير
طريقة عمله من اللوز
- انقع كوباية لوز في مياه لمدة ساعتين وصفيه
- اخلطه مع 3-4 كوبايات مياه باردة بالتدريج لمدة 10 دقايق لحد ما يوصل للقوام اللي تحبه
- صفيه في طبق كبير عليه قماشة تصفية الجبنة واضغطها عشان تنزل أكبر قدر من اللبن
- احفظه في إزازة بغطا محكم في التلاجة.. صالح لـ 3-5 أيام
- ممكن تحليه بإضافة حبتين بلح أو كاكاو
- استخدم لب اللوز الباقي في وصفات حلويات أو مع الزبادي
طريقة عمل اللبن من الشوفان
- اخلط كوب من الشوفان مع 3-4 أكواب مياه في الخلاط.. قلل كمية المياه لو عايز قوامه سميك
- ضيف رشة ملح
- في حاجات اختيارية ممكن تضيفها عشان تحلي طعمه زي حبة بلح مع نص معلقة صغيرة فانيليا أو معلقتين كبار كاكاو خام
- غطي الخلاط كويس واخلطه من 30 ثانية لحد دقيقة أو أكتر لحد ما المكونات تمتزج كويس
- تجنب الخلط الزايد لأنها ممكن يخلي القوام كريمي بشكل غير محبب
- دوقه عشان تحدد لو محتاج حاجة إضافية للتحلية
- صب الخليط فوق بولة كبيرة عليها فوطة رفيعة جدا لتصفيته من أي بقايا لحبوب الشوفان السليمة
- احفظه في زجاجة محكمة وسيبه في التلاجة.. صالح لمدة 5 أيام
