المحتويات
تسوس الاسنان هو ضرر دائم بيحصل في أجزاء من السطح الصلب للأسنان وبيكون على شكل ثقوب صغيرة أو كبيرة بشكل تدريجي، وبيصيب الأطفال والمراهقين بنسبة أكبر بسبب قلة تنضيف الأسنان أو بكتيريا الفم أو تناول المشروبات السكرية.
في حالة عدم علاجه أو تجاهله لأنه لا يسبب ألم، المشكلة بتكبر وبيسبب آلام شديدة والتهابات واحتمالية فقدان الأسنان.
أسباب تسوس الأسنان
- تناول الحلويات والمشروبات اللي فيها سكر بكميات كبيرة وبالتالي بتبدأ بكتيريا الفم بالتغذية عليهم وتشكل اللويحات (غشاء شفاف يغطي السن)
- اللويحات دي بتتصلب على الأسنان أسفل خط اللثة أو فوقه وبتتحول لجير اللي بيخلي اللويحات أصعب في إزالتها لأنه بيعمل درع للبكتيريا
- أحماض اللويحات بتزيل المعادن الموجودة في مينا الأسنان الخارجية الصلبة وده بيسبب فتحات صغيرة أو ثقوب فيها وهي أول مراحل تسوس الأسنان
- بمجرد تآكل أجزاء من مينا الأسنان، بتبدأ البكتيريا والأحماض بالوصول للطبقة التانية من الأسنان (العاج) وهي طبقة أكتر رقة وأقل مقاومة للأحماض وبتتواصل بشكل مباشر مع أعصاب الأسنان وده اللي بيسبب حساسية الأسنان
- مع استمرار التسوس بيستمر تدمير الأسنان لحد ما يوصل للجزء الداخلي منها اللي فيه أوعية دموية وأعصاب، وبيتم الضغط على الأعصاب وده اللي بيسبب الألم
- قلة تنضيف الأسنان أو عدم استخدام الطرق الصحيحة لحمايتها
- اتباع عادات خاطئة لأسنانك
أعراض تسوس الاسنان
الأعراض وحدتها بتختلف حسب حجم التسوس ومكانه ولو في بدايته ممكن ماتظهرش أي أعراض، لكن مع تطوره وتآكل المينا بتظهر أعراض زي:
- ألم الأسنان أو ألم مفاجىء بيحصل بدون سبب واضح
- ألم خفيف أو شديد عند الأكل أو شرب المشروبات الساخنة والباردة أو أكل الحلويات
- ظهور حفر أو فجوات واضحة في الأسنان
- حساسية الأسنان
- بقع بني أو سوداء أو بيضاء على سطح الأسنان
- ألم عند قضم الأكل
عوامل الخطر
كل الأشخاص معرضة للإصابة بتسوس الأسنان، لكن خطورته بتزيد في الحالات دي:
موقع الأسنان: غالبا تسوس الأسنان بيصيب الأسنان أو الضروس الخلفية اللي فيها تجاويف كتير وبالتالي الأكل بيتراكم فيها وبيكون من الصعب تحافظ على نظافتها دايما
مشروبات وأطعمة معينة: في أطعمة معينة بتسيب أثر على الأسنان وبتلصق فيها وقت أطول وتنضيفها بيكون أصعب من باقي الأطعمة زي
- الحليب
- الآيس كريم
- الحلويات
- البطاطس الجاهزة
- الكيك والبسكويت
- المشروبات الغازية
- الحلوى
تناول الوجبات الخفيفة والحلويات بشكل مستمر: تناول أطعمة زي البطاطس الجاهزة والحلويات بشكل مستمر بيسبب إن بكتيريا الفم تفرز أحماض تهاجم الأسنان وبتسبب تآكلها
تغذية الأطفال أثناء أو قبل النوم: فالمشروبات السكرية أو الحليب أو التركيبة الغذائية بتفضل موجودة على أسنانهم طوال ساعات النوم وبتكون مصدر لتغذية البكتيريا المسببة للتآكل
السن: الأشخاص الأكبر في السن أكتر عرضة للإصابة بيه
جفاف الفم: بيحصل بسبب نقص اللعاب اللي ليه دور في الوقاية من تسوس الأسنان عن طريق تنضيف الأسنان من اللويحات والأطعمة، والمواد اللي في اللعاب بتساعد على مواجهة الأحماض اللي بتنتجها البكتيريا
الأدوية والعلاج: بعض الانواع من الأدوية والعلاجات زي العلاج الكيميائي بيزود خطر الإصابة بتسوس الأسنان لأنها بتقلل إفراز اللعاب
عدم تنضيف الأسنان بالشكل الصحيح أو للمدة الكافية
عدم الحصول على كمية كافية من عنصر الفلورايد: عنصر مهم للحفاظ على صحة الأسنان وبسبب فوائده بيتم إضافته لمعجون الأسنان وغسول الفم ولكنه غير متوفر في المياه المعدنية
حرقة المعدة: بتسبب ارتجاع حمض المعدة للفم واحتمالية تآكل مينا الأسنان وزيادة هجمات البكتيريا ليها
اضطرابات الأكل: فقدان الشهية ممكن يسبب تآكل مينا الأسنان والحمض الناتج عن القيء المتكرر بيغطي الأسنان وبيسبب تحلل المينا تدريجيا
مضاعفات تسوس الاسنان
ممكن يسبب مضاعفات خطيرة ومستمرة في حالة تجاهله حتى بالنسبة للأطفال اللي أسنانهم مؤقتة وتتضمن المضاعفات:
- الألم الشديد
- خراج الأسنان
- تورم أو صديد حوالين السن
- تكسر أو تلف السن
- ظهور مشكلات في المضغ
- تغيير مواقع الأسنان في حالة فقدان السن المتسوس
- التهابات حادة
- في حالة شدة التسوس، ممكن الألم يعيق الحياة والروتين اليومي
- فقدان الوزن والإصابة بمشكلات التغذية لصعوبة المضغ
- فقدان الأسنان
- في حالات نادرة ممكن يسبب خراج الأسنان لمشكلات تانية مهددة للحياة زي التلوث الحاد
أنواع تسوس الاسنان
تسوس السطح الأملس للاسنان
- بيصيب الجزء الناعم من الأسنان نتيجة لتراكم الجير على جوانبها
- سهل علاجه وممكن تتجنبه بالاهتمام بتنضيف الأسنان باستمرار بالفرشة والمعجون وخيط الأسنان مرتين على الأقل يوميا
- علاجه بيكون أصعب في حالة ظهوره في مناطق بين الأسنان
تسوس الحفر والشوق
- بيصيب غالبا الضروس الخلفية
- بسبب وجود حفر وتجويفات بيتحتفظ بالأكل والسكريات بيحصل تآكل لها بتظهر في بقع سوداء أو بيضاء
- هي الأكتر انتشارا في حالات التسوس
- بيتطور بشكل سريع في حالة عدم علاجه واتباع الخطوات اللازمة لحماية الأسنان وتنضيفها
تسوس الجذر
- بيحصل نتيجة إهمال تسوس الضروس لحد ما يوصل لجذر السن المحفورة
- بيتضر الجذر بشكل أكبر بسبب عدم وجود كمية من مينا الأسنان الواقية فبينتشر بسرعة
- منتشر بين الأشخاص اللي بيعانوا من تراجع اللثة
الوقاية من تسوس الاسنان
- غسل الأسنان على الأقل مرتين يوميا بعد الأكل والشرب بمعجون أسنان فيه فلورايد
- استخدام خيط الأسنان بعد الوجبات للتخلص من بقايا الأكل في تجاويف الأسنان
- اغسل فمك بغسول الفم اللي فيه فلورايد بشكل دوري
- اعمل فحوصات منتظمة مع دكتور الأسنان عشان تلحق أي مشكلة في بدايتها
- تجنب تكرار تناول الوجبات الخفيفة والمشروبات على مدار اليوم وخصص مواعيد للأكل
- انتظم على تناول الأطعمة اللي بتحافظ على صحة الأسنان زي الخضار والفاكهة وتجنب الأطعمة والمشروبات اللي بتقلل إفراز اللعاب زي القهوة والبطاطس الجاهزة والمشروبات الغازية
- لو كنت مهدد بالإصابة بتسوس الأسنان بسبب الانتظام على أدوية معينة أو بسبب مشكلة صحية زي تراجع اللثة، اسأل الدكتور عن الأدوية المناسبة لحماية أسنانك
- استبدال المياه المعدنية بالمياه العادية النقية
- اسأل الدكتور عن الختام المانع للتسرب وهو عبارة عن طلاء بلاستيكي وقائي يوضع على سطح الأسنان الخفية لقفل التجاويف والشقوق اللي بتجمع الأكل وبتحمي مينا الأسنان من اللويحات والأحماض ولكن لازم تفحصها بانتظام
- الاهتمام بحشو الأسنان في حالة تسوسها وفحصها بانتظام لتجنب تفاقم المشكلة وراقب نفسك لو ظهرت عليك أعراض تدل على احتياجك لتغيير الحشو زي:
- لو أسنانك حساسة لدرجة الحرارة/ الحلويات/ الضغط عليهم
- الشعور بالألم عند الأكل أو شرب حاجة باردة أو ساخنة
- لو الأسنان حساسة للمسها بإيدك أو فرشاة الأسنان
- في حالة الشعور بالضغط عند قضم الأكل
- الشعور بألم مفاجئ في سن أو أسنان معينة حتى لو مش بتاكل
- لو الهواء البارد بيزود حساسية أسنانك
- المعاناة من ألم دائم فيه وفي الأسنان اللي حواليه
- ظهور بقع سوداء في الحشو
- لو خيط الأسنان اتقطع بعد استخدامه في مكان الحشو
- ظهور ثقوب في الأسنان عند تنضيفها
- الشعور بوجود خشونة على سطح الأسنان
- لو حسيت إن الحشو مكسور أو مشقق
