المحتويات
الواي فاي ضروري لتسهيل التصفح على الإنترنت ومشاهدة الأفلام والمسلسلات وتحميل الأغاني والتواصل مع المقربين والمذاكرة والشغل، وأصبح جزء أساسي في حياتنا لا غنى عنه، لكن أحيانًا بعض المشكلات بتحصل بسبب ضعف سرعته أو الضغط الزيادة عليه ممكن تضعفه وتقلل جودته اللي هتنعكس على شغلك ومذاكرتك أو تواصلك مع الآخرين.
طريقة تقوية الواي فاي في البيت
- ابعد الراوتر عن أي حاجة معدن وأجهزة الموجات الكهرومغناطيسية (راديو/ تليفزيون/ ميكرويف)
- ابعده قدر المستطاع عن أي جسم تاني سواء خشب أو معدن أو بلاستيك أو زجاج
- خلي الراوتر في مكان عالي بعيد عن الأرض، والأحسن تختار مكان في نص البيت بالظبط
- اعمل باسوورد قوي عشان تتأكد إن مفيش حد بيستخدم الواي فاي بتاعك
- اختار باسوورد فيها حروف ورموز وأرقام وبلاش تحط فيهم اسمك أو رقم موبايلك أو تاريخ ميلادك
- استخدم جهاز موسع للشبكة (Extender) يوصل الإشارة للأماكن البعيدة عن الراوتر، واشتري مقوي للإشارة للاب توب أو الـPC
- بلاش تستخدم راوتر بقاله أكتر من سنتين، وجدد الراوتر باستمرار
- اعرف عنوان الـ IP اللي تدخل بيه من اللاب توب على صفحة الراوتر من موفّر الخدمة لعمل آخر تحديث وتضمن عمله بكفاءة عالية
- وبعدها اختار من عليه Firmware Update أو Router Update حسب نوع جهازك وانتظر مدة لأنه بياخد وقت
- وبلاش تفصل الراوتر عن الكهرباء إلا لما تتأكد إن التحديث اكتمل
- جرب قنوات اتصال تانية غير 1 و6 لأنهم القناتين اللي أغلب الأجهزة بتستخدمها في اتصال بالواي فاي وغيّرها
- عن طريق الدخول لصفحة الراوتر من خلال عنوان الـ IP وبعدها ابحث عن اختيار Wireless Settings
- هتلاقي تحتها اختيار Channels ومنها اختار قناة مختلفة عن اللي موجود وجرّب لو هتشتغل معاك ولا لأ
طريقة تزويد السرعة لو فيه ضغط من الأجهزة عليه
- بلاش تضغط عليه بأكتر من جهاز لو سعته 2.4GHz والأحسن تشتري راوتر سعته 5GHz لو هتستخدم أكتر من جهاز في نفس الوقت
- افصل الواي فاي من على جهازك كل فترة وشغله تاني
- بلاش تفتح فيديوهات من كل الأجهزة في نفس الوقت والأحسن تنظم مشاهدة الفيديوهات أو التحميل حسب الأهمية
- وصّل الإنترنت من كابل مباشرة للراوتر وبلاش تعتمد على الواي فاي عشان تستفيد بأقصى سرعة للإنترنت لو محتاج تخلص شغل ضروري على الـ PC أو اللاب توب أو أي جهاز تاني
- اشتري جهاز موسع للأماكن البعيدة عن الراوتر (Extender)، عشان يوصل الإنترنت بقوة مشابهة لكل البيت
- أو جهاز باورلاين اللي بيتصل بالكهرباء وبيحافظ على نفس سرعة الإنترنت في كل أجزاء البيت حتى لو أكتر من جهاز متصلين بيه
- اتأكد إن أجهزتك خالية من الفيروسات لأن أغلبها بيزود استهلاك الإنترنت وبالتالي بيضعفه وبيقلل سرعته
- بلاش تفتح أكتر من علامة تبويب أو متصفح في نفس الوقت واكتفي بحاجة واحدة فقط
- تطبيقات كتير بتساعدك تقوي الواي فاي على الموبايل للأندرويد زي تطبيقات
Wifi Analyzer /Wifi Manager/ Wifi Signal Strength Meter /Wifi Data- Signal Analyzer/ Wifi Router Master - تطبيقات تانية للآيفون بتقوي الواي فاي وبتساعدك تشغل الصفحات أو الفيديوهات حتى لو الشبكة ضعيفة زي Scany-Network Scanner/ Fing /Wi-Fi SweetSpots
طريقة تقويته على اللاب توب
- خلي اللاب توب قريب من الراوتر قدر المستطاع
- حمّل آخر تحديث لنظام الويندوز أو الماك حسب جهازك
- اتأكد من تفعيل التحديثات الحاصة بالراوتر على صفحة الـ IP الخاصة بيه اللي هتعرفها من خلال الشركة اللي بتوفر الخدمة، لما تاخد اسم المستخدم وكلمة السر وتدخل على الصفحة الخاصة بالراوتر بتاعك
- اختار من عليها Firmware Update أو Router Update حسب نوع جهازك، وبعدها انتظر لمدة لأنه بياخد وقت، وبلاش تفصل الراوتر عن الكهرباء إلا لما تتأكد إن التحديث اكتمل
- اكتب نوع موديل اللاب توب وابحث عنه على جوجل جنب كلمة Device Manager وNetwork Adapters عشان تتأكد إذا كان جهازك بيدعم السرعة اللي بيوفرها الإنترنت ولا لأ
- اقفل أي صفحات مش بتستخدمها أو برامج بتستهلك من رامات الجهاز حتى لو مش متصلة بالإنترنت
- جرّب اقفل الواي فاي في الأجهزة التانية خصوصًا الموبايلات وراقب لو سرعة الإنترنت على اللاب توب لو رجعت لطبيعتها
أضرار التقاط واي فاي مجهول المصدر
- بيسهل على أي مخترق دخول جهازك خصوصًا لو اسم الشبكة يخص مكان معروف ولكن بدون كلمة سر لأنه بيبقى عامل جذب لتسجيل أكبر قدر من الأجهزة عليه وبالتالي بيقدر يخترقها عشان يوصل لأدق المعلومات عليها
- بيتعرف على كل معلومة على جهازك سواء رسالة استقبلتها أو أرسلتها
- بيبعت المخترق رسايل في شكل إعلانات أو برامج بتكتشف تحميلها تلقائيًا على جهازك وممكن تبقى مصدر لفيروس يخترق جهازك أو حتى يمسح كل المعلومات من عليه
- أحيانًا في بداية ضغطك على اسم الشبكة المفتوحة بيجيلك إشعار حسب نوع تليفونك بظهور آخر تحديث، ولما بتضغط على موافقة أو OK بيخترق جهازك فورًا
الحماية من واي فاي مجهول المصدر
- بلاش تدخل على شبكة واي فاي مجهولة المصدر خصوصًا لو ملهاش كلمة سر لأن ده بنسبة كبيرة معناه إنها مصممة لجذب الآخرين لاختراق أجهزتهم
- اقفل الاتصال التلقائي بأي شبكة واي فاي متاحة
- اتأكد من اسم شبكة الواي فاي لو بره سواء كنت في شركة أو مطعم
- حمل برامج Antivirus على أجهزتك عشان تقاوم أي محاولة اختراق لسرقة معلوماتك
