الغضب: أسبابه وأعراضه وطرق السيطرة عليه

الغضب والمشاكل اللي بيسببها بتأثر على قدرة الشخص على استكمال يومه بشكل طبيعي، سواء كان شعور عابر أو موجة قوية من الغضب المكبوت، وهو صحي وطبيعي لكن في حالة خروجه عن السيطرة، بيسبب مشاكل كتير.

ما هو الغضب؟

هو حالة عاطفية تتراوح درجاتها ما بين الانزعاج الخفيف للغيظ والسخط الشديد، وحسب تعريف الدكتور تشارلز سبيلبرجر، فهو زي غيره من المشاعر تصاحبه تغيرات فسيولوجية وبيولوجية

وعند الشعور بيه بتزيد ضربات القلب وضغط الدم بيرتفع وهرمونات الطاقة زي الأدرينالين

أسباب الغضب

ممكن تحس بيه نتيجة لمواقف معينة زي المشاكل الأسرية والمادية أو بسبب عوامل داخلية زي تذكر تجارب سابقة وذكريات مؤلمة أو الإصابة بالاكتئاب، والأسباب الرئيسية للشعور بيه هي:

الاكتئاب

الغضب ممكن يبقى عرض للاكتئاب، وهو الشعور بالحزن الدائم وفقدان الشغف لأي شيء على الأقل أسبوعين

شدته وطريقة التعامل معاه -سواء بالتعبير عنه أو كتمانه- بتختلف من شخص للتاني

في حالة الإصابة بالاكتئاب، بتظهر عليك أعراض زي:

• فقدان الطاقة
• سهولة العصبية والتهيج
• فقدان الأمل والحزن الدائم
• الأفكار الانتحارية أو أذى النفس

اضطراب الوسواس القهري

• هو نوع من الاضطرابات المرتبطة بالقلق وبيعتمد على التفكير في أفكار متكررة غير منطقية وغير مرغوب فيها، وبتظهر في تفكير الشخص بشكل ملح، زي الرغبة في غسل الإيدين بالرغم إنك غسلتها مرتين قبل كده
• أو تكرار جملة معينة أو عد الأرقام بسبب فكرة غير منطقية إن في حدث سيء هيحصل
• الغضب عرض للوسواس القهري، وبيصيب حوالي نص الاشخاص المصابة بيه، وبيكون نتاج شعور الشخص بالإحباط من عدم قدرته على التحكم في أفكاره الوسواسية

تناول الكحول

الدراسات أثبتت إن تناول الكحول بيسبب الغضب، وبيزود نسبة معدلات الجريمة، لأنه بيصعب التفكير الصحيح واتخاذ القرارات في الوقت المناسب

اضطراب فرط الحركة وتشتت الانتباه (ADHD)

هو خلل في النمو العصبي وبتظهر أعراضه في 3 جوانب أساسية وهي فرط الحركة وضعف التركيز والاندفاع أو المعاناة من الـ3 جوانب

الغضب المؤقت أو المزمن ممكن يصيب الأشخاص المصابة بيه وبيصاحبه:

• عدم القدرة على التخطيط وفقدان الشعور بالوقت
• الإهمال واللامبالاة
• صعوبة التركيز

اضطراب التحدي المعارض (ODD)

نمط من السلوك المزاجي اللي بيتسم بالحدة والعصبية وسهولة الاستثارة ونزعة الانتقام والغضب

اضطراب ثنائي القطب

• هو حالة عقلية بتسبب تقلبات مزاجية مفرطة وحادة، والتقلبات دي ممكن تتغير من الفرح للشعور بالاكتئاب
• بالرغم من إن مش كل المصابين بيمروا بنوبات الاكتئاب إلا إن معظمهم بيمروا بالغضب وسهولة التهيج

الاضطراب الانفجاري المتقطع

اضطراب سلوكي بيتضمن فترات متكررة وفجائية من السلوك العدواني أو الاندفاعي، والأشخاص المصابة بيه بيعملوا ردود أفعال غاضبة مبالغ فيها تجاه مواقف بسيطة

نوبة الغضب بتستمر لحد 30 دقيقة وبدون إنذارات، والأشخاص المصابة بيحسوا بالغضب وعدم القدرة على التحمل معظم الوقت

بيصاحب الاضطراب أعراض زي:

• الجدالات
• الخناق
• العنف البدني
• رمي الأشياء
• نوبات غضب متكررة

الحزن

الغضب واحد من مراحل الحزن، وبيصاحبه مراحل تانية زي الصدمة والشعور بالذنب والوحدة والخوف

أعراض مشاكل الغضب

بتنقسم لأعراض عاطفية وأعراض جسدية، والأشخاص اللي بيمروا بيه ممكن يحسوا بالأعراض دي بشكل متكرر ومنفصلين أو مع بعض حسب الموقف

الأعراض الجسدية

الغضب بيأثر على كل أعضاء الجسم، زي القلب والعقل والعضلات، ودراسة سنة 2011 أثبتت إنه بيزود معدل هرمون الكورتيزول (هرمون التوتر) في الجسم والأعراض هي:

• ارتفاع ضغط الدم
• زيادة ضربات القلب
• الشعور بالتنميل والخدر
• شد العضلات

الأعراض العاطفية

الشخص بيمر بمجموعة من المشاعر مع المرور بنوبة غضب، سواء قبلها أو أثنائها أو بعدها، زي:

• سهولة الاستثارة
• الإحباط
• القلق المزمن
• الضغط العصبي
• الشعور بالذنب
• كتمان المشاعر السلبية

أنواع التعبير عن الغضب

طريقة تعبيرك عنه بتختلف من شخص للتاني

• للخارج: بيعتمد على التعبير عنه بشكل واضح وصريح، وبيتضمن سلوك زي الصوت العالي والألفاظ السيئة وكسر الأشياء واستخدام الإيذاء الجسدي واللفظي تجاه الآخرين
• للداخل: بيعتمد على توجيهه لنفسك، من خلال الكلام السلبي عن نفسك وإنكار الأشياء اللي بتسعدك أو احتياجاتك الأساسية زي الأكل، وبتلجأ لانتقاد نفسك
• الإسقاط: بيعتمد على توجيهه أو تفريغه بشكل غير مباشر، زي الصمت أو السخرية من الطرف التاني أو الانتقاد القاسي ليه

أعراض المعاناة من الغضب

• تكرار الشعور بيه مهما كان الموقف بسيط
• صعوبة التحكم فيه
• بيأثر على علاقتك بالآخرين
• غضبك والتصرفات الناتجة عنه بتأذي الآخرين
• بيخليك تعمل تصرفات أو تقل كلام بتندم عليه
• بتستخدم الإيذاء البدني واللفظي مع الطرف التاني
• بتستخدم العنف والتهديد مع الطرف التاني في حالة غضبك
• الشعور بالإجبار لممارسة أي فعل عنيف زي تكسير الأشياء أو السواقة السريعة في حالة غضبك
• الابتعاد عن مواقف مهمة بسبب خوفك من عدم قدرتك على التحكم في غضبك

طرق السيطرة على الغضب

إدارة الغضب بيعتمد على:

الأساليب الطبية

• زي اللجوء لمعالج نفسي واستخدام العلاج السلوكي
• تناول الأدوية لعلاج حالات الاكتئاب أو القلق المزمن أو اضطراب فرط الحركة وتشتت الانتباه
• حضور جلسات علاج جماعي لتعلم طرق إدارة الغضب
• حضور المجموعات الداعمة مع الأشخاص اللي بيعانوا من نفس المشكلة أو مشكلة مشابهة ليها

أساليب تتبعها لإدارة غضبك زي:

• العد من واحد لعشرة أو لحد 100 في حالة الغضب الشديد
• خد عدة أنفاس بطيئة من أنفك وخرجهم من فمك
• امشي في مكان مفتوح أو سوق عجلة
• اتعمد تسترخي كل عضلات جسمك من الرأس لحد أصابع القدم
• ردد عبارة معينة هتساعدك تهدى وتعيد تركيزك زي (اهدى) أو (كل حاجة هتبقى كويسة)
• اعمل تمارين التمدد زي تمارين اليوجا أو لف الرقبة والأكتاف في كل الاتجاهات
• اقعد في غرفة فاضية وغمض عينك وتخيل منظر محبب ليك وركز في تفاصيله زي لون البحر وصوت العصافير
• اسمع موسيقى وميل جسمك معاها
• وقف كلام واقفل فمك بشكل متعمد عشان تاخد فرصة تراجع فيها أفكارك
• اعمل فعل محبب وخير لشخص تاني عشان تطلع مشاعرك والطاقة اللي داخلك في شيء إيجابي
• خصص كراسة عشان تكتب فيها مشاعرك والأفكار اللي بتفكر فيها في لحظة الغضب
• خد وقت استراحة يومي مخصص ليك عشان الدقايق دي هتساعدك تنظم مشاعرك
• خصص صورة معينة تفكر فيها لما تحس بالغضب عشان تربط بينها وبين التوقف عن التصرف الغاضب
• مارس تمارين الاسترخاء بشكل يومي، زي تمارين اليوجا أو التنفس العميق
• مارس الامتنان يوميا عن طريق كتابة أو التفكير في 3 أشياء ممتن ليها مهما كانت بسيطة
• اكتب مشاعر الغضب في شكل جواب أو رسالة وبعدين امسحها عشان تكون فرغت الطاقة اللي حاسس بيها
• ركز على الحلول بدل المشكلة، وجهز حلول لمواقف مشابهة في المستقبل واتدرب عليها عشان تكون جاهز في حالة حدوثها
• مارس الرياضة بانتظام لأنها هتساعد في تفريغ طاقة الغضب اللي بتحس بيها يوميا

الغضب وتأثيره على عمر الإنسان

• الدراسات أثبتت إن الغضب المكتوب بيسبب مشاكل صحية زي متلازمة القولون العصبي وارتفاع ضغط الدم وأمراض القلب وزيادة معدل الكوليسترول الضار
• وممكن يسبب مشاكل زي اضطراب الأكل والنوم والسمنة وداء السكري 2 والإدمان والتدخين
• وبيسبب مشاكل نفسية زي تدني تقدير الذات المزمن، واللي بيسبب مشاكل تانية زي الاكتئاب والقلق المزمن
• دي كلها عوامل بتأثر على العمر الافتراضي للإنسان وبتعلي خطر الوفاة المبكرة