اضطراب ثنائي القطب: أعراضه وإزاي تتعامل صح مع المصاب

اضطراب ثنائي القطب ومعروف باسم (الهوس الاكتئابي) مرض عقلي بيظهر في شكل حالات مزاجية بين الشديدة والمنخفضة، وبيمر المصاب بفترات يحس فيها بالسعادة المفرطة والحيوية وفترات تانية بيحس بحزن شديد ويأس وعدم الرغبة، وبين الفترات دي بيكون شخص طبيعي، ويعتبر مرض مزمن، لكن تقدر تتحكم في أعراضه من خلال خطة علاجية بتضمن الأدوية وبعض التغييرات في نمط الحياة.

ما هو اضطراب ثنائي القطب؟

• مرض عقلي بيسبب بتغيرات شديدة في المزاج ومعروف باسم (الهوس الاكتئابي)
• كلمة “هوس” بتوصف الأوقات اللي بيحس فيها المصاب بالإثارة الشديدة ومشاعر الاندفاع والتهيج والتهور، وأغلب الحالات بتصاب بأوهام (الاعتقاد بأشياء غير صحيحة) أو الهلوسة (رؤية أو سماع أشياء غير موجودة)
• أما كلمة اكتئابي فهي بتشير لفترات تانية بيحس فيها المصاب بحزن شديد مع نفس أعراض اضطراب الاكتئاب الشديد 
• بيعاني المصاب بصعوبة في إدارة مهام الحياة اليومية زي المدرسة أو العمل أو الحفاظ على العلاقات

أعراض اضطراب ثنائي القطب

أعراض نوبات الهوس

• الشعور بالابتهاج والنفسية الجيدة
• سرعة الانفعال والحساسية
• سرعة الاهتياج
• الإحساس بعدم الحاجة للنوم
• فقدان الشهية لتناول الطعام
• التحدث بسرعة وفي أكتر من موضوع في نفس الوقت 
• أفكار كتير ومتخبطة
• الشعور بالقدرة على القيام بأكتر من حاجة في نفس الوقت 
• الشعور بالأهمية والإبداع 
• تعاطي المخدرات 
• زيادة الرغبة الجنسية

أعراض نوبات الاكتئاب

• الشعور بالحزن والقلق
• الفراغ وعدم وجود أمل لأي شيء
• عدم بالراحة أو الهدوء
• الأرق أو النوم لساعات طويلة
• زيادة الشهية وزيادة الوزن
• التحدث ببطء شديد
• الإحساس بعدم وجود حاجة للحديث
• النسيان
• صعوبة في التركيز لاتخاذ أي قرار
• عدم القدرة على القيام بأي شيء حتى البسيطة
• عدم الاهتمام 
• الإحساس بعدم الجدارة والتقليل من الذات
• التفكير بالموت والانتحار

بيتم تشخيص إصابة الرجال والنساء بالاضطراب ثنائي القطب بأعداد متساوية، وبتختلف الأعراض الرئيسية بينهم في بعض الحالات زي:

للنساء

• يتم تشخيصها بين الـ20 والـ30 سنة من عمرها 
• نوبات الاكتئاب أكتر من الهوس
• بتعاني من 4 نوبات هوس واكتئاب في السنة 
• بيصاحبه بعض الأمراض زي أمراض الغدة الدرقية والسمنة واضطرابات القلق والصداع النصفي
• النساء أكتر عرضة للإصابة بانتكاسات وارتبط ده بالتغيرات الهرمونية المتعلقة بالدورة الشهرية والحمل وانقطاع الطمث

للرجال

• بيتم تشخيصه في سن مبكر
• نوبات الهوس بتكون أكتر 
• بتزيد مشاكل تعاطي المخدرات
• أكتر عرضة للانتحار

 عند الأطفال والمراهقين

• بيصعب تحديد الأعراض لأن الأطفال مش بيظهر عليهم نفس أعراض البالغين
• بتتداخل كمان مع أعراض تاني بيصاب بها الأطفال زي اضطراب نقص الانتباه مع فرط النشاط (ADHD
• زي الكبار..بيعاني الأطفال المصابين من نوبات مزاجية مرتفعة بيكونوا فيها سعداء ومنفعلين عكس فترات الاكتئاب  بيعانوا من الانطوائية والهدوء وعدم الاهتمام بالأشياء المفضلة.

أسباب اضطراب ثنائي القطب

على الرغم من عدم تحديد سبب دقيق للإصابة باضطراب ثنائي القطب، إلا إن بعض العوامل بتلعب دور كبير زي:

• اختلافات بيولوجية في المخ  
• الوراثة ووجود تاريخ عائلي للإصابة بالمرض
• الإصابة بنوبات توتر شديدة ومرتبطة ببعض الأحداث زي الوفاة
• إدمان المخدرات والكحول
• ممكن الاعتداء الجنسي في مرحلة الطفولة يكون سبب الإصابة

أنواع اضطراب ثنائي القطب

النوع الأول

• بيصاب الشخص بنوبات هوس بتستمر لمدة 7 أيام على الأقل، وفي بعض الأحيان ممكن يحتاج لوجوده في المستشفى
• أما نوبات الاكتئاب بتستمر لمدة أسبوعين، في بعض الحالات بيعاني المصاب بمزيج من الهوس والاكتئاب مع بعض

 النوع الثاني

• بيتميز إنه النوبات من الاكتئاب والهوس بتكون طفيفة وخفيفة
• وحالة الهوس الطفيف بتكون أقل حدة من حالة الهوس من النوع الأول من ثنائي القطب

اضطراب دوروية المزاج (Cyclothymic Disorder)

• بتستمر نوبات الهوس الخفيف والاكتئاب لمدة سنتين على الأقل
• لو كان المصاب مراهق أو طفل بتستمر سنة واحدة 

علاج اضطراب ثنائي القطب

لازم تكون فاهم إن الإصابة ياضطراب ثنائي القطب حالة طويلة الأمد بتحتاج لرعاية مستمرة، ممكن المصاب يعاني من أربع نوبات مزاجية أو أكتر في السنة

العلاج الدوائي

• مثبتات الحالة المزاجية زي كاربامازيبين أو لاموتريجين أو الليثيوم أو فالبروات
• الأدوية المضادة للذهان زي كاريبرازين أو لوراسيدون أو أولانزابين (زيبريكسا) أو كويتيابين (سيروكويل)
• مضادات الاكتئاب والأدوية المضادة للقلق زي المهدئات

العلاج النفسي 

• علاج الإيقاع الشخصي والاجتماعي (ISPRT)، وبيعتمد على وجود روتين يومي لكل شيء من النوم للأكل، وبيساعد في الحفاظ على استقرار المزاج
• العلاج السلوكي المعرفي (CBT)، بيساعد على استبدال العادات والأفعال السيئة ببدايل إيجابية، وبيساعد في  تعلم كيفية إدارة التوتر والمحفزات السلبية
• التربية النفسية، وبيستهدف تعليم أفراد الأسرة عن الاضطراب ثنائي القطب عشان يكون يقدروا يقدموا الدعم عند حدوث النوبات للمصاب

دور المقربين في دعم مريض اضطراب ثنائي القطب

• التفهم والاستيعاب لأنه بيكون مش عارف السبب الرئيسي لتغيير مزاجه
• إقناع المصاب بإنه مرض نفسي ويحتاج للعلاج  
• عدم إلقاء اللوم على المريض حول إصابته 
• مساعدته في الحصول على روتين يومي عشان يقدر يحافظ على استقرار الحالة المزاجية
• اسمعه بانتباه بكل حماس 
• حسسه بأنك هتحميه وتقف جنبه من غير ملل
• في وقت النوبات مهم تكون حذر ومنتبه لتصرفاته خاصة مع وجود أفكار انتحارية
• كمان مهم تركز معاه في إدارة صرف الأموال لتجنب الإسراف أو تعاطي المخدرات
• شاركه بعض الأنشطة زي الخروج للتمشية أو ممارسة الرياضة أو السفر