المحتويات
الجاثوم بيحصل للشخص النايم لما بيفضل صاحي جزئيًا، وواعي بالمحيط اللي حواليه بس مش بيقدر يتحرك كأنه مشلول، أساطير كتير بتتقال على الظاهرة دي، لكن تفسيرها العلمي معروف ودقيق وبينبهك لشي ممكن يأثر سلبيًا على صحتك.
تعريف الجاثوم
- العلماء بيصنفوا الجاثوم على إنه من اضطرابات النوم اللي بتحصل لما المخ بيبقى في حالة يقظة، لكن الجسم في حالة نوم، وبيتسمى بشلل النوم المؤقت
- الجمعية الأمريكية للنوم بتقول إنه بيعتبر حالة انتقالية من الاستيقاظ للنوم
- بيعتبر من الاضطرابات اللي بتسبب توتر عضلي كامل بيسبب فقدان الشخص لوظيفة العضلات خلال النوم لمدة مؤقتة
- الدراسات بتأكد إن ناس كتير بيبدأ إحساسهم بالظاهرة دي بداية من سن الـ 14 لحد الـ 17، وبتستمر معاهم حتى لما يكبروا
- بيعاني 5% لـ 40% من الأشخاص من ظاهرة الجاثوم مرة واحدة في حياتهم على الأقل
طريقة حدوثه
- العلماء بيفسروا إن سببه الحقيقي خلل مؤقت في الوظايف الأساسية للدماغ، خصوصًا في الفترة بين اليقظة وسكون حركة العين السريعة (REM)
- بتقل الخلايا العصبية في بعض مناطق جذع الدماغ، ومع قلة هرمون الميلاتونين (هرمون النوم) بتزيد فرص تكرار الجاثوم عند بعض الأشخاص
- بيستمر الجاثوم في بداية مرحلة حركة العين السريعة، أغلب اللي بيمروا بالتجربة دي بيشوفوا أحلام بتحاكي الواقع كأنه بجد
- عشان جسمك يحمي نفسه من تأثير الأحلام دي اللي ممكن تخليك تتصرف بعنف وعصبية وتأذي نفسك، بيفرز الدماغ مجموعة مواد كيميائية عصبية بتخليك تتنقل بين حالات النوم واليقظة
- قلة إفراز المواد دي بيخلي الدماغ في حالة وعي كامل أثناء المرحلة بين النوم واليقظة
- لكن بيحس الجسم بالتناقض بين اليقظة، وبين حركة النوم السريعة أثناء النوم
- في الحالة دي بتتسرب بعض الأحلام للعقل الواعي وده بيفسر رؤية بعض المجسمات أو الأشخاص في اللحظة بين النوم والاستيقاظ
- بتتشل أغلب عضلات الجسم بصورة مؤقتة باستثناء عضلات العينين والحجاب الحاجز
أسباب الجاثوم
- تاريخ عائلي متكرر لنفس الحالة (عوامل وراثية)
- الضغوط النفسية
- النوم على الضهر
- اضطرابات النوم والأرق
- المعاناة من بعض حالات اضطراب ما بعد الصدمة، والاضطراب ثنائي القطبين، والفصام
- ارتفاع ضغط الدم
- توقف التنفس أثناء النوم
- الصداع النصفي
- إدمان بعض الأدوية المضادة للهلوسة والمنومات
- الإفراط في شرب الكحوليات
الأحلام المصاحبة للجاثوم
- الأحاسيس الحركية الدهليزية اللي بيحس بيها الشخص كأنه طاير في السماء، وبيتخيل إن روحه منفصلة عن جسمه
- تخيل وجود طرف غريب في الغرفة سواء شخص يعرفه عايش أو ميّت، أو تخيل جسد مجسم شكله غريب
- الكوابيس الغريبة اللي بتختلف من شخص للتاني وبيحس الشخص بعدها بألم جسدي شديد زي لما يحس إنه تعرض لحادث سيارة مؤلم ويصحى حاسس كأنه في الحادثة وبيحس بجزء من الألم
الأعراض
- هلوسة
- صعوبة التنفس
- آلام العضلات
- التعرق الزايد
- صداع شديد
- الإحساس باقتراب الموت
- الشعور بضغط قوي على الصدر
- الإحساس بالسقوط أو إن قوة خارقة بتجذبك لتحت
- الخوف والرعب لمدة دقايق حتى بعد الاستيقاظ
- بس بتختفي الأعراض بمجرد لمس شخص تاني ليك، وفي أوقات كتير بتدرك إن كل ده وهمي بس بتحاول تسترجع سيطرتك على جسمك اللي بتاخد منّك وقت
الوقاية
- نظم جدول نومك وحافظ على 8 ساعات نوم بالليل
- العب رياضة باستمرار لكن في بداية اليوم أو نصّه وبلاش تلعب رياضة عنيفة قبل النوم بـ 4 ساعات
- حافظ على نظام حياة صحي وقلل تناول الأطعمة الغنية بالدهون، والسكريات
- بلاش تنام على ضهرك والأحسن تنام على جنبك أو بطنك
- عالج أي مشكلة بتواجهك زي تنميل الأطراف، أو تقلصات العضلات
- حافظ على درجة حرارة مناسبة في الغرفة أثناء النوم، وتجنب النوم في غرفة درجة حرارتها مرتفعة أو منخفضة زيادة عن اللزوم
- ابعد عن الأجهزة الإلكترونية قبل النوم بساعتين سواء الموبايل أو التليفزيون
- بلاش تستسلم للخوف منّه، لأن الدراسة أكدت إن الخوف المفرط من الجاثوم بيزوّد فرص تعرّضك له أكتر 3 مرات عن الطبيعي
