المحتويات
الكتب سواء كانت قديمة أو جديدة بتحتاج طريقة خاصة للعناية بيها عشان تقلل فرص تلفها أو قطع أوراقها خصوصًا لو مفيش عندك مكتبة تخزّنها فيها بطريقة مثالية تحميها من الحشرات أو الأتربة، وبالتالي هيحتاج منّك الاهتمام بالكتب تخصيص جزء من وقتك ومجهود بسيط لإطالة عمرها الافتراضي وتقليل أي تفكيك فيها.
طريقة الحفاظ على الكتب لأطول فترة
- اغسل إيدك قبل التعامل مع أي كتاب ولو قديم الأحسن تلبس جوانتي
- ابعد عنه أي أكل أو سوائل وتجنب استخدام اللعاب لتقليب الصفحات
- اقلب الصفحات برفق للحفاظ على الأوراق وبلاش تتني أي صفحات
- استخدم الإشارات المرجعية (Bookmark) من الخيوط الناعمة وبلاش تستخدم المصنوعة من البلاستيك أو الورق
- بلاش تتني الغلاف وإنت بتقرأ لأن الضغط على الكتاب هيأثر على تماسك الصفحات داخله
- أقرأ على سطح مستوي ولو لازم تشيله يبقى بإيديك الاتنين وبلاش تمسكه بإيد واحدة
- نضفه بحتة قماش جافة عشان تتخلص من الأتربة
- حطه بجانب كتب تانية على رف مخصص وبلاش تحطه فوق كتب تانية لأن التشققات هتزيد وهيتلف الغلاف أسرع
- بلاش تحتفظ بيه في شنطة بلاستيك لأنه بيحتاج يتعرض للهواء
- احتفظ بيه بعيد عن الشمس لمدة طويلة
خطوات تنضيف الكتب
- استخدم فرشة أسنان قديمة أو قطعة قماش جافة ونضف بيها حواف الكتاب من كل الإتجاهات
- نضّف في إتجاه واحد بس عشان تحميها من القطع
- ركب الجزء المخصص للستاير في المكنسة الكهربائية وافتحها على أقل درجة ليها
- مرر فتحة المكنسة على غلاف الكتاب لإزالة التراب المتراكم بكمية كبيرة
- هات قطعة قماش ناشفة ومررها على الصفحات من الداخل للخارج
- حط الكتاب في كيس بلاستيك محكم الغلق ورش جواه بيكنج صودا وسيبه يوم أو اتنين عشان تتخلص من أي روايح كريهة
- ودخّل الكيس في الفريزر في مكان واحد بعيد عن الطعام لو شاكك إن فيه حشرات
- مرر الأستيكة على مكان أي خطوط غير مرغوب فيها مكتوبة بالقلم الرصاص
- شيل الزيت أو السوايل على الورق بمناديل بس المهم تلحقها بسرعة قبل ما تنشف
- املا نص كوباية خل ونصها التاني مياه واغمس فيها قطعة قطن
- مرر القطن برفق على أي بقع على الورق وادعكها في إتجاه واحد واحتفظ بمنديل مكان البقعة بعد تنضيفها
تخزين الكتب القديمة
- استخدم صناديق بلاستيك ليها غطا عشان تحط فيها الكتب
- بتحميها من وصول الحشرات ليها وبتقلل فرص وجود تراب عليها ولو صندوق كرتون ضروري يكون قوي ولازم يتقفل بإحكام
- قسم الكتب عليها حسب المجالات أو الحروف الأبجدية ليها والزقها على كل صندوق
- حطها في مكان مناسب بعيد عن الرطوبة أو أشعة الشمس
- ابعد عن الأكل جنب مكان تخزينها لأنها ممكن تبقى سبب في وصول الحشرات ليها
- أفضل طريقة إنك تحطهم فوق بعض أو توقفهم على القاعدة
- أي طريقة تانية هتأثر على جودة الكتاب وهتضر أوراقه
- الكتب النادرة الأحسن تشتري ليها حافظة تحميها وتبقى بعيدة عن الباقيين
- اهتم بنضافتهم وإزالة أي أتربة عليهم باستخدام قطعة قماش نضيفة أو منفضة ريش
خطوات إصلاح كتاب مفكك
لو بعض أجزاء الكتاب متماسكة
- رتّب الصفحات المفككة وخليها على جنب
- اشتري غراء مخصص للصق الكتب (غالبًا بيبقى في شكل أنبوب طويل)
- حط منه كمية مناسبة على الطرف الداخلي اللي بيربط الصفحات ببعضها مكان انفصال الصفحة/الصفحات
- الزق الصفحة أوالصفحات المفككة برفق واتأكد إن أطرافها موازية لباقي الصفحات
- اضغط بقوة عشان تلتصق الصفحات صح
- اقفل الكتاب واربطه بأي سلك أو قطعة قماش قوية لمدة يوم كامل
لو الغلاف منفصل عن الأوراق
- وقّف الكتاب على القاعدة وحدد الاتجاه والوضع الصحيح المناسب للصق الأوراق بالغلاف
- هات سكينة قديمة عرضها مناسب وحط عليها كمية غراء مناسبة
- مررها على طرف الغلاف اللي بتلتصق فيه كل الصفحات
- امسك الأوراق وخليها تلتصق بقوة فيه
- هات قطعة بلاستيك مربعة واضغط بيها على طرف الورقة الأولى في اتجاه طرف الغلاف
- وبعدها استخدم قطعة كارتون أو ورقة شمع بنفس الحجم وحطها فوق أول صفحة
- اقفل الكتاب ومرر قطعة البلاستيك فوق طرف الكتاب
- خلي الكتاب بين قطعتين خشب أو كتابين وزنهم تقيل
- الأحسن تحط إبرة التريكو أو أكتر عند أول أو آخر صفحة عشان تزود الضغط وخلي الكتاب في نفس الوضع لمدة يوم كامل
