المحتويات
العلاج النفسي مصطلح عام لعلاج مشاكل الصحة العقلية من خلال الكلام مع طبيب أو أخصائي نفسي أو غيره من الأشخاص من اللي يقدروا يقدموا خدمات الصحة العقلية، هنقولك فوائده وخطوات الاستعداد ليه وطرق اختيار الدكتور المناسب.
أهمية العلاج النفسي
اللجوء ليه خطوة عادية ومهمة لكل الأشخاص خاصة لو:
- بتواجه أزمة معينة
- التعرض لفترة طويلة من الاكتئاب أو القلق الزايد
- بتمر بتغيير كبير في حياتك
- وجود مشاكل أسرية كبيرة
- علاقتك العاطفية بشريكك بتمر بأزمات مؤخرا
- بتحاول تتخطى إدمان شيء معين أو تتغلب على أفكار معينة بتمر بيها ومأثرة على حياتك
- المعاناة من اضطرابات شخصية زي اضطراب الشخصية الحدية أو اضطراب الشخصية الاتكالية
- المرور بأعراض الاضطرابات المزاجية زي الاكتئاب واضطراب ثتنائي القطب
- بيقدم المساعدة الكافية بالطريقة الصحيحة بدون إصدار أحكام عليك وعلى تصرفاتك
أهمية العلاج النفسي الفردي
العلاقة بينك وبين المعالج اللي بتظهر أثناء جلسات العلاج هي أساس النجاح، وهيساعدك على اكتشاف نفسك وأفكارك والأشياء المقلقة ليك
على عكس أنواع التانية من العلاج، المعالج بيركز عليك بشكل كامل لفهم المشاكل اللي بتمر بيها وإيجاد طرق للتأقلم معاها وتخطيها
ليه فوائد زي:
- تطوير مهارات إتصالك مع نفسك والآخرين
- بيساعدك على الشعور بالقوة والتمكن
- بيمنحك القوة لاكتشاف مناطق خفية في حياتك والتعامل معاها بشكل واضح
- بيساعدك على تعلم طرق عمل اختيارات أصح في المستقبل
- إيجاد طرق صحية للتأقلم مع المواقف الصعبة
فوائد العلاج الأسري
نوع من أنواع العلاج النفسي اللي بيساعد الأسرة على حل النزاعات وتحسين التواصل بينهم، و المعالج بيحاول إنه:
- يقيم ويعالج الاضطرابات العقلية والعاطفية والاضطرابات السلوكية
- يحدد المشاكل اللي موجودة في العلاقات بينهم
- عكس العلاج النفسي الفردي، العلاج الأسري بيركز على كل أفراد الأسرة حتى لو المستهدف من العلاج شخص واحد بس لأنه بيركز على علاقاته مع باقي أفراد الأسرة
من أهم مميزات العلاج الأسري هي:
- تطوير مهارات التواصل
- توفير المساعدة الكافية لعلاج المشاكل العقلية اللي بتأثر باقي أفراد الأسرة زي (الاكتئاب والصدمة والإدمان)
- بيوفر المساعدة من باقي أفراد الأسرة
- بيساعد على إيجاد طرق للتأقلم مع المشكلة بشكل فردي
- تحديد الطرق المناسبة لإيجاد الدعم الصحي
فوائد العلاج الزواجي
هو نوع من أنواع العلاج النفسي وبيساعد الأزواج على معرفة وحل المشاكل بينهم وتحسين علاقتهم، ومن خلال الاستشارة الزوجية هتقدر تاخد قرارات مدروسة عن إعادة علاقتك بشريكك أو اختيار الانفصال
من أهم فوائد العلاج الزواجي هي:
- تطوير مهارات الاتصال بين الطرفين
- إيجاد حلول منطقية للمشاكل
- محاولة إعادة الثقة بينهم الشريكين من جديد
- زيادة الدعم المشترك بينهم
- إيجاد طرق لتجديد الحميمية
- فهم أهمية الدعم العاطفي للطرفين ومعرفة طرق التعبير المناسبة عنه
- تكوين علاقة أقوى
فوائد العلاج السلوكي المعرفي
نوع من أنواع العلاج النفسي المنتشرة اللي بيعتمد على العلاج بالكلام وأساسه نوعين العلاج: السلوكي والمعرفي
المعالج بيساعد المريض على فهم أهمية التفكير في مشاعره والتصرفات اللي بيقوم بيها نتيجة ليها
المعالج بيستخدم العلاج ده مع حالات:
- اضطراب القلق الزايد
- اضطرابات الأكل
- الاكتئاب
- الإدمان
- اضطراب الوسواس القهري
- اضطراب الكرب التالي للصدمة
- الفوبيا
- اضطراب ثتنائي القطب
أعراض الاحتياج للعلاج النفسي
في علامات وطروف معينة تقدر من خلالها تحدد لو محتاج تلجأ للعلاج النفسي، زي:
- لو بتمر بتغيرات في الحالة المزاجية أو السلوك أو الإنتاج والنشاط واستمرت معاك لفترة طويلة
- الشعور بفقدان الأمل وإن مفيش مستقبل وصعب تحس بانبساط وغير قادر على تغيير الوضع من علامات الاكتئاب
- القلق الزايد المستمر لفترات طويلة وبيمنعك تستمتع بالحياة خاصة لو صاحبه ألم البطن والصداع
- النوم القليل أو لعدد ساعات مبالغ فيها واستمرار اضطرابات النوم لمدة أسابيع
- الأكل النهم حتى لو مش جعان أو خسارة الوزن غير المبررة وفقدان الشهية من علامات الاكتئاب
- إدمان حاجة معينة زي المخدرات/ الأكل/ شرب الكحول/ اللجوء للجنس عشان تهرب من تفكيرك
- لو بقيت صعب تتحمل الناس حواليك وغير قادر على الصبر وعصبي معظم الوقت
- بتتجنب النشاطات اللي كنت بتمارسها والأنشطة الاجتماعية أو رؤية الآخرين
- قلة إنتاجيتك في العمل أو الحياة الاجتماعية أو سيطرة الأفكار السلبية عليك واللي بتشتتك عن الإنجاز
- لو بتواجه صعوبة في تنظيم مشاعرك والشعور بالحزن أو اللامبالاة أو عدم الاكتراث معظم الوقت
- لو بتواجه صعوبة في التواصل مع عيلتك والأشخاص اللي حواليك وبتخسر علاقتك بيهم تدريجيا وغير قادر على تغيير ده
- لو اتعرضت لصدمة قبل كده زي الاعتداء الجنسي/ التحرش/ العنف المنزلي/ التنمر ولم تلجأ لمتخصص عشان يساعدك
- لو صحتك البدنية تدهورت زي ضعف المناعة/ التهاب الجسم المزمن/ الشعور بالتعب/ أمراض القلب بسبب اضطرابات النفسية اللي بتمر بيها
- لو بتفضل العزلة الإجتماعية أو بتخاف تتكلم عن المشكلة ومشاعرك حتى مع نفسك
علامات الاحتياج للعلاج الزواجي
اللجوء ليه خطوة مهمة في حالة اضطراب العلاقة بينك وبين شريكك، وفي بعض الأحيان الأشخاص ممكن تلجأ ليه قبل الزواج لمعرفة درجة التوافق بينك وبين شريكك وتكوين صورة مبدئية عن احتياجات كل طرف من التاني، والعلامات هي:
- لو التواصل بينكوا قل والكلام بقى على قد الموقف أو بتستخدم التواصل السلبي اللي بيوصل لشريكك إحساس بالخجل والإهانة وعدم الأمان والتقدير
- طريقة الكلام مهمة لأن الطريقة السلبية ممكن تحسسه إنك بتستغله عاطفيا
- الخوف من الكلام في مواضيع معينة زي الفلوس أو الجنس أو الطلبات البسيطة
- لو شريكك بيستغل حبك ويعاقبك بيه زي إنه يتجنبك بسبب حاجات صغيرة
- الشعور والتعامل على إن كل طرف إن في فريق لوحده
- كل واحد حقه يحتفظ ببعض أسراره بس لما تخاف تحكي أي حاجة دي علامة عدم ثقة
- لو النقاشات حتى البسيطة بتوصل لخناق ومش بتوصلوا لحل وسط
- إخفاء حالتك المادية عن شريكك
- لو بقيت بتتمنى إنه يتغير
- في حالة عدم ارتباط حياتكوا ببعض والحميمية في الكلام والمواقف بينكوا بتقل
- لو العلاقة الجنسية بدأت تقل وتبقى مملة مع الوقت أو نشاط العلاقة الجنسية بزيادة لأنها ممكن تبقى دليل على إحساس بالذنب بسبب تقصير في حاجة تانية
- الخناق على حاجات بسيطة بشكل متكرر بدون محاولة فهم أهمية سبب الخناقة بالنسبة للطرف التاني اللي ممكن تكون أقل أهمية بالنسبالك
- لو بدأت تتخيل نفسك في علاقة مع شخص تاني معناه إنك غير راضي عن علاقتك الحالية
- التفكير المتكرر في الانفصال ومترددين عشان في أطفال بينكوا
علامات المعالج النفسي الجيد
المعالج النفسي لازم تتوافر فيه بعض الخصائص تقدر من خلالها تحدد لو هو جيد ومناسب ليك، زي:
- وقت الجلسة مخصص للمريض بشكل كامل للكلام عن مشاكله وقلقه واحتياجاته فهى علاقة من طرف واحد
- المعالج ممكن يبقى ودود بس مش صديقك
- لازم تحس بالتطور في الجلسات لأنه وقت الجلسة مهم وغير عشوائي وليه أهدافه المحددة
- العلاج النفسي والتوقعات منه لازم تكون مبنية على أساس علمي مش مجرد وعود بالتغيير
- المعالج النفسي لازم يسمع بإنصات بدون إصدار أحكام أو المبالغة في النصيحة لأن المريض بيحتاج للشعور بالتقبل والانتباه ليه والتعاطف والتشجيع
- العلاج النفسي الجيد بيسهل عليك الوصول لصحة نفسية سليمة والقدرة على الاستماع والكلام عن أفكارك الداخلية اللي بتحاول تتجنبها
- الجلسات الجيدة بتوفرلك مساحة آمنة للصراحة والتعبير عن النفس والوصول للمشاعر الحقيقة واستغلالها للشفاء
- لازم يطور عندك المرونة والاستقلالية والقدرة على اتخاذ القرار ومهارات الحياة
- لو اعتمادك على المعالج بيزيد مع الوقت يبقى دي علامة على طريقة علاج غلط
- لازم يوفرلك مساحة للكلام عن الماضي والخبرات السابقة ويساعدك تعبر عنها بسهولة
- توفير مساحة الاعتماد على مشاركة ومعرفة مشاعر وأسباب سلوك المريض أثناء العلاج ويركز على فهمه بشكل مؤكد ويكون واعي بتكوينه الداخلي وظروف حياته وأفكاره بشكل كامل
- لازم يساعدك تتعلم طرق تفكير جديدة للتواصل مع الآخرين وفهمهم والتعامل مع مشاعرك المختلفة
- يركز على تعاملاتك مع العالم الخارجي ويساعدك تمارس مهارات جديدة وتتبنى عادات جديدة
- لازم يعمل حدود واضحة زي عدم الحديث عن مشاكله الشخصية أو الكشف عن معلومات شخصية غير متعلقة بالعلاج
- في علامات معينة لو حصلت لازم تتجنب المعالج زي لو استخدم ألفاظ أو أفعال بتسبب شعورك بعدم الارتياح أو بيحاول يتواصل معاك خارج الجلسات لأسباب غير متعلقة بالعلاج
- أو لو حسيت إنك مش مسموع أو بتحس بالخجل من مشاعرك لما بتتكلم معاه
- لازم يعدل طرق العلاج والتقارب مع احتياجاتك الشخصية لتحقيق الارتياح النفسي أثناء الجلسة
التوقعات من العلاج
المعالج بيجمع فيها معلومات عنك وعن احتياجاتك وممكن يطلب منك ملء استمارات لجمع معلومات عن صحتك البدنية ةالعاطفية الحالية والسابقة، وممكن يحتاج أكتر من جلسة لمعرفة مشكلتك الأساسية
الجلسة الأولى بمثابة تعارف بينكم لاكتشاف لو طريقته وشخصيته هيناسبك ولا لأ، ولازم تسأل وتفهم:
- نوع العلاج اللي هيستخدمه
- مدة الجلسة
- أهداف العلاج
- متوسط عدد الجلسات اللي محتاجها
- العلاج النفسي عادة بيتطلب جلسة أو جلستين أسبوعيا ولكن ده بيختلف حسب الحالة وتقدير المعالج، وبتستمر الجلسة من 30 دقيقة لساعة