أنواع بخاخ الأنف وكيفية استخدامه والأعراض الجانبية

بخاخ الأنف من أشكال الجرعات الدوائية اللي بتوصل الدواء لتجويف الأنف وإعطاء تأثير موضعي وعلاج أعراض بعض الأمراض زي الرشح أو حساسية الأنف، بتختلف أنواعها بين البخاخات اللي ممكن يتم صرفها بدون وصفة طبية، والبخاخات اللي لازم تستخدمها تحت إشراف طبي، بالإضافة لنوع المادة الفعالة.

أنواع بخاخ الأنف

بخاخ أنف ممكن تصرفه بدون وصفة طبية

1. يمكن استخدامها بعد استشارة الصيدلي في الحالات البسيطة
2. وبنتقسم لأنواع حسب المادة الفعالة زي:

بخاخات الأنف المزيلة للاحتقان

• تعمل على تخفيف احتقان الأنف المصاحب للرشح أو حمى القش أو حساسية الأنف من خلال تضييق الأوعية الدموية في بطانة تجويف الأنف، وتقلص الأنسجة المتضخمة، للتنفس براحة أكتر
• بعض الفئات ممنوعة من استخدامها زي: مرضى القلب وارتفاع ضغط الدم والسكري والغدة الدرقية، ومشاكل التبول بسبب ورم في غدة البروستاتا والأطفال أقل من 6 سنين
• بتستخدم لمدة 3 أيام بحد أقصى، وتجنب زيادة الجرعات عشان تتفادي الأعراض الجانبية
• منها: بخاخ الأوكسيميتازولين/ بخاخ فينيل إفرين

بخاخات الأنف الملحية

• معروف ببخاخ أنف مياه البحر، بيساعد في تخفيف جفاف الأنف المصاحب لحالات الحساسية ونزلات البرد والتهاب الأنف، والتهاب الجيوب الأنفية
• كمان بتقلل لزوجة المخاط وتمنعه من التيبس وتسهل خروجه، وتجنب انغلاق مجرى الأنف بسبب المخاط الجاف
• ممكن تستخدمها لفترات طويل ومتكررة زي في أوقات الجو البارد لعدم احتوائها على مادة دوائية فعلية
• بتتوفر تركيزات مختلفة حسب عمر المريض وشدة الأعراض، ومنها بخاخ محلول ملحي طبيعي مخفف عالي التوتر

بخاخات الأنف الستيرويدية

• بتعمل على تخفيف أعراض احتقان وسيلان الأنف والعطس وحكة الأنف المصاحبة للحالات الحادة من الرشح أو حساسية الأنف وحساسية الجهاز التنفسي العلوي أو مع وجود التهاب بكتيري في جيوب الأنف
• مفعولها بيبدأ في خلال أسبوع من بدء الاستخدام
• تجنب استخدامها للأطفال أقل من سنتين
• مهم تسأل الدكتور قبل استخدامها.. لو بتعاني التهاب في العين أو في حال وجود ارتفاع في ضغط العين أو الجلوكوما أو مريض الربو أو التحسس الجلدي أو لو بتستخدم الأدوية اللي بتحتوي مشتقات الكورتيزون
• مهم توقفها بشكل تدريجي بعد استخدامها لفترات طويلة لتجنب الأعراض الجانبية
• من أمثلتها: الفلوتيكازون/ البودسونيد/ التريامسينولون

بخاخ الأنف كرومولين الصوديوم

• بيستخدم للوقاية ولتخفيف أعراض حساسية الأنف زي سيلان الأنف وحكة الأنف والعطس وانسداد الأنف التحسسي
• تجنبها لو بتعاني من آلام الجيوب الأنفية وتغير لون مخاط الأنف أو الصفير أو في حالة الحمل أو الرضاعة الطبيعية

بخاخات أنف بتحتاج وصفة طبية 

بعض أنواع بخاخ الأنف الستيرويدي

• له قدرة عالية على تخفيف الأعراض، بالإضافة لارتفاع نسبة الإصابة بآثار جانبية
• من أمثلته: البكلوميثازون/ السيكليسونايد/ الموميتازون

بخاخ أنف مضاد للهيستامين

• بيستخدم  للحساسية بيخفف أعراض الاحتقان وحكة وسيلان الأنف والعطس المصاحب لحساسية الأنف
• من أمثلته: ازيلاستين/ الأولوباتادين

بخاخ الأنف إبراتروبيوم

• بيقلل سيلان الأنف من خلال تقليل إنتاج المخاط، وبيستخدم في حالة السيلان الناتج عن حساسية الأنف
• النوع ده مش بيخفف أعراض الاحتقان والعطس بشكل فعال
• تجنب استخدامها لو مريض الجلوكوما وتضخم غدة البروستاتا

كيفية استخدام بخاخ الأنف

قبل الاستخدام 

• جهز كل اللي هتحتاجه: البخاخ المنتظم أو المضخة ومناديل عشان تتجنب أي ارتباك أثناء الاستخدام
• نظف الأنف من المخاط عشان تضمن وصول جرعة الدواء لغشاء تجويف الأنف بشكل صحيح
• اغسل إيدك ونشفها كويس
• رج زجاجة البخاخ قبل الفتح والاستخدام

عند الاستخدام

• ثبت البخاخ بحيث يكون الطرف الأمامي للبخاخ بين الأصابع والإبهام من الأسفل
• اقفل فتحة الأنف اللي مش هتدخل فيها البخاخ بضغطة خفيفة
•  الطرف الأمامي من البخاخ داخل فتحة الأنف، وميل الرأس بشكل خفيف عشان الدواء يوصل وراء الأنف مش في اتجاه الحاجز الأنفي
• اسحب نفس عميق من خلال فتحة الأنف أثناء الضغط بالإبهام على أسفل البخاخ لإخراج الجرعة منه
• خرج طرف البخاخ، واسحب نفس عميق عشان تتأكد من عدم خروج الجرعة
• استنى 10 ثواني قبل ما تكرر نفس الخطوات في الجرعة التانية في فتحة الأنف التانية

بعد الاستخدام 

• مهم تقفل الغطاء كويس لتجنب تلوث طرف البخاخ
• اغسل إيدك كويس بالمياه والصابون

الأعراض الجانبية لبخاخ الأنف

• حرقان ووخز جوه الأنف
• العطس
• زيادة إفرازات الأنف

بعض الأعراض الجانبية مهم توقف استخدامها وتستشير دكتور لو لاحظتها زي:

• انخفاض القدرة على التنفس
• ضعف نبضات القلب
• ارتفاع أو انخفاض في ضغط الدم
• النعاس
• تهيج الغشاء المخاطي
• تورم في الفم أو الحلق
• عدم الاستجابة خلال أسبوعين أو زيادة أعراض الرشح أو الحساسية
• الصداع